Israel-in Gaza a beih leh mi 104 thi, inkahhai kalpui zui leh
Israeli-ten Thawhlehni zana Gaza an kah thar lehnaah thi chu Palestinian 104 an tlin thu Hamas hnuaia health ministry chuan a sawi a, Nilaini chhun atang khan inkahhai kalpui leh nghal a ni bawk.
Israel hian US ruahman anga inkahhai inremna an neih chu Hamas-in an bawhchhia nia puhin an bei leh a ni.
Israeli defence minister chuan Hamas hian Thawhlehni khan Gaza chhim lamah Israeli sipai an that a, mi hren thi tawh ruang kir tura an inremna pawh an bawhchhe bawk niin a sawi a. Hamas erawh chuan he thilah hian inrawlhna an nei lo niin an sawi thung.
US President Donald Trump-a chuan inkahhai mekah ‘thil duhawm lo’ a thleng lo tih a la sawi a; mahse, an sipaite beih an nih erawh chuan Israel-in ‘a chhang let dawn’ tih a sawi.
Israeli-te hian Gaza hmar lama Gaza City leh Beit Lahia, lailia Bureij leh Nuseirat leh chhim lama Khan Younis-ah te in, sikul leh residential building te an kap niin hmutute chuan an sawi.
Gaza City-ah hian mei leh a khu a nasa a, thil puak ring tak tak pawh hriat tur a awm tih hmututen an sawi.
Gaza-a health ministry chuan mi 104 thi zinga 46 chu naupang an ni a, hmeichhia 20 an tel bawk tih a sawi a. Mi 250 chuangin hliam an tuar bawk niin an sawi.
Civil Defence thupuangtu chuan khawpuiah hian mi 14 an thi thu leh chhim lama Sabra vengah hmeichhe pathum leh mipa pakhat dama lak chhuah an ni tih a sawi.
Bureij refugee camp-ah chhungkaw khata mi panga an thi a. Khan Younis khawpui hmarthlang lama lirthei tlan lai thlawhnain a kah fuhah mi panga an thi tih a sawi bawk.
Thawhlehni zan khan Israeli Prime Minister Benjamin Netanyahu-a pisa chuan a sipaite chu Gaza ‘na taka chhu turin’ thu pek tihchhuah a ni a, a chhan mumal tak erawh sawi a ni lo.
Hetih lai hian defence minister chuan Hamas hian Thawhlehniah Gaza-ah Israeli sipai an that a, ‘tiam chin an pel’ niin a sawi.
“Hamas hian sipai an beih leh mi hren an kir thei lo a nih chuan na takin kan chhang let ang,” a ti.
Hamas hian Israeli sipai beihnaah an tel lo tih an sawi a, Israeli-ten Gaza an bei leh chu an dem thu an sawi.
An sipai pawl chuan Israel-in inkahhai ‘an bawhchhiat’ vangin mi hren ruang an an kir tur an tikhawtlai dawn tih an sawi ve.
Tharum thawhna thleng thar leh mah se US chuan inkahhai chu a ngaiin a la kal tih a sawi a. Air Force One atangin President Trump-a chuan, “Israeli sipai thah a ni a, Israeli-ten an chhang let a, an chhang let tur pawh a ni,” a ti.
UN human rights chief Volker Türk-a chuan mi eng emaw zat thah an nih chu ‘tha lo’ a tih thu leh lehlam lehlam chu muanna tichhe thei ang thil ti lo turin a ngen.
Nilaini chawhnuah khan inkahhai chu a ngaia kalpui a ni tih puan zui lehnghal a ni a; mahse, a hnu lawkah IDF chuan van sang atangin hmar lama Beit Lahia an kap leh a, an kah hmun hi mi beihna tur ralthuam dahna hmun niin an sawi.
Palestinian chanchinbyte chuan al-Salateen hmun kahnaah hian mi pakhat a thi niin an sawi ve bawk.
Israel leh Hamas hi kum hnih an indo hnuah US, Egypt, Qatar leh Turkey palaina hmangin Trump-an point 20 nei rawtna zawmin inkahhai an kalpui a. October 10-a inremna an siam hnuaiah hian Hamas-in Israeli an hren dam laite darkar 48 chhunga chhuahin thi tawh ruang pawh darkar 72 chhungin an hlan let tura tih an ni.
Dam lai 20 chu October 13-ah chhuah an ni a, Israel-in Palestinian lung in tang 250 leh Gaza-a an man mi 1,718 an chhuah ve bawk.
Israel hian Palestinian ruang 195 an hlan a, Hamas hian Israeli an hren ruang 13 an hlan bawk a, an zinga pahnih hi Thai leh Nepalese an ni.
Gaza-ah Israeli ruang 11 la awmin Tanzanian leh Thai pakhat ve ve an la awm bawk.
Israel-in Gaza a beih leh mi 104 thi, inkahhai kalpui zui leh
