Israel-in Gaza a beih lehnaah mi pariat thi
Kum khat chhung inkahhai kalpui a ni tawh chungin Israeli-te chuan Gaza an beih chhunzawmnaah naupang telin mi pariat an thi leh tih damdawi inten an sawi.
Pathiannia hmar lam, Gaza City-a Al-Rimal veng, Cairo School bula civil mite missile-a kahnaah mipa naupang kum li mi telin mi pathum an thi tih damdawi in thuneituten an sawi.
Chhim lama Khan Younis khawpuiah, Hamas enkawl interior interior ministry chuan drone-in Al-Mawasi venga police officer-te duty a fuhnaah panga an thi tih a sawi bawk.
Israeli sipaite erawh chuan hmun hnih an beihte hi mi hlauhawm niin an sawi a, a finfiahna erawh angmah an sawi lo.
Gaza City daia Shifa Hospital-in video an tihchhuahah chuan body bag pahnih leh naupang, hrukpuan vara tuam ruang bula mi eng emaw zat awm khawma an tawngtai lai a lang.
“Ka fapa leh a fapa an martar a. An puan inah tuma tibuai lovin an awm a, missile-in a rawn fuh thut a, an martar ta a ni,” tiin Ali Oweis-a chuan AFP news agency a hrilh a. “Inkahhai hi a awm tak tak lo, indona a la kal zel, in hmu ve lo em ni?” tiin a sawi bawk.
Khan Younis-a Nasser damdawi inin video a tihchhuahah chhuiata body bag dah bula hmeichhia an ding lai a lang a. Interior ministry chuan police officer panga thite hming pawh a puang tawh a, kum 23 leh 53 inkar an ni.
Nikum October atang khan Gaza-ah hian inkahhai puan a ni a; mahse, Israeli-te hian ni tin deuhthaw an beih chhunzawm reng tho.
Gaza-a Hamas enkawl health ministry chuan inkahhai puan a nih hnuah mi 1,580 an thi tawh niin a sawi a, an chhinchhiahna hi UN-in rintlakah an ngai a. Israel chuan Hamas-te chauh an bei a, civil mi an bei ngai lo niin an sawi ve thung.
Gaza-a muanna a awm theih nana Donald Trump-a sorkarin ruahmanna a siam chu a la kal chhunzawm thei rih lo.
Inkahhai inremna a kalpui angin Israel-a Palestinian mante chhuah an ni a, Hamas-in Gaza-a an hren mi 48 an chhuah ve bawk.
Indona hi Hamas-in October 7, 2023-a Israel an beih atanga intan niin mi 1,200 chuang an that a, hren turin mi 251 an hruai bawk.
Israel-in Gaza a beih zuina atanga indona chhuakah hian mi 74,594 an thi tawh niin health ministry chuan a chhinchhiah.
Israel-in Gaza a beih lehnaah mi pariat thi
