Israel chuan Zirtawpni atang khan Gaza chu indo thlawhna leh laipuite hmangin a bei leh tan a, Hamas te nena inkahhai inremna an siam chu a zawh tawh avangin an beih chhunzawm thu a sawi nghal bawk.
“Hamas ten operational pause kan siam an bawhchhia a, hei ai bakah hian Israel ram lamah silai an kapchuak a ni,” tiin Israeli military te chuan an sawi a.
“IDF (Israel Defense Forces) te chuan Gaza Strip-a Hamas terrorist pawlte beihna a chhunzawm leh ta,” tiin an tarlang.
Israel sipaite chuan Gaza atangin rocket kahchhuah a nih thu sawiin Gaza chu Israel indo thlawhnate pawhin an beizui nghal a, Gaza City laipui kah a ni bawk.
Heng bakah hian drone te pawh thlawh tir niin inkahhai awm hnua thlawhtir leh hmasak ber tiin AFP reporter chuan a sawi a.
Hamas leh Israel-te hian tang inthleng tawnin ni sarih chhung zet inkahhai an nei a, Hamas ten Israel mi tang an kawl te chhuahin Israel pawhin Palestinian tangte a chhuah bawk. Chu mai bakah inkahhai laiin Gaza Strip-ah tanpuina tam tak thawnluhin a awm theih phah bawk.
Ninganni khan US top diplomat Antony Blinken chuan Israeli leh Palestinian officials te hmuin inkahhai chu pawhsei ni se tiin a ngen a, indona an chhunzawm a nih pawhin Palestinian civilians te chu humhimin an awm tur a ni a ti bawk.
Israel leh Hamas te indona hi October 7 a Hamas ten Gaza atanga Israel ram luta mi 1,200 chuang tihlum leh mi 240 vel an man atanga intan a ni a.
Israel chuan Hamas-te chu nuaibo intiamin lei, tui leh vansang atangin a bei a, Gaza-a Hamas sorkar chuan Israel chetlakna avangin nunna chan 15,000 chuang an awm tawh a ti.
Qatar hmalakna hnuaiah inkahhaina neih lawk niin chumi hmang chuan Israeli tang 80 leh Palestinian tang 240 inthleng tawnin an awm bawk.
Hetih lai hian Israeli Prime Minister Benjamin Netanyahu chuan video tichhuakin chutah chuan, “Hamas-te nuai chimih kan intiam a, tumahin min dang lovang,” a ti.
Mahse civilian-te tawrhna a nasa tiin Netanyahu sorkar chuan nawr a tawk mek thung a, Blinken ngei pawhin Israel chuan humanitarian civilian protection plan a siam ngei tur a ni a, pawisawi lo Palestinian te tawrhna a thleng tur a ni lo a ti a.
Israel chuan a bik takin Gaza chhim leh hmun lailai te chu designate area-ah siam se heng hmunte hi chu indona kalpui lohna tur a ni tiin Blinken chuan a sawi bawk a.
Hetih lai hian New York Times chuan Israel thuneitute chuan Hamas te chetlak dan tur an hre lawk a, an beih dan tur blueprint pawh an nei sa vek a, an blueprint neih sa ang deuh thlapin Hamas te chu an che reng a ni, a ti.
Mahse Israel intelligence leh military officials te chuan Hamas te chetlak tumna chu thil tak tak lovah ngaiin an uksak zui lo a ni a ti bawk.
Israel in Gaza beih
