Israel-in Gaza puihna tur phur lawng 13 dang
Israeli sipaite chuan Gaza pan ram dang activist leh puihna bungraw phur lawngleng 13 a dang a, 30 dang erawh chuan Palestinian-te chenna hmun pan hian an kal chhunzawm tih lawnglenga zin (flotilla) huaihawttuten Ningani khan an sawi.
Israeli foreign ministry-in video a tihchhuahah lawnglenga Gaza pan zinga langsar ber chu Swedish climate campaigner Greta Thunberg niin sipaiten an hual karah lawngah hian a thu tih a lang.
“Hamas-Sumud flotilla eng emaw zat chu dan niin a chuangte pawh Israeli lawngchawlhnaah hruai an ni,” tiin Israeli foreign ministry chuan X-ah a tar lang a. “Greta-i leh a thiante hi an him,” an ti bawk.
Gaza-a damdawi leh ei tur phur luh tumtu, Global Sumud Flotilla-ah hian mi mal lawngleng 40 telin parliamentarian, lawyer leh activist 500 chuangin an buaipui a ni.
Flotilla-a chuangten Telegram-a video an dah chhuahah chuan an passport an lek lang a, ruk bo an ni a, an duh lo chung Israel-in a hruai niin an sawi a. An tum chu tharum thawh lova mihringpuite puih a nih thu an sawi.
Flotilla hi Israel-in Gaza-a luh a danna dodalna langsar ber pakhat a ni.
Mediterranean Sea an kân a, ram tam takin an ngaihven niin Turkey, Spain leh Italy ramte chuan an mi chuang veten harsatna an tawh palh takin tiin lawngleng leh drone an tir chhuak ve bawk a, hengte hi Israel chuan kir turin a lo ti tawh nghe nghe.
Turkish foreign ministry chuan Israel-in flotilla ‘a bei’ chu ‘firfiaka chetna’ tia sawiin pawi sawi lo civilian nunna an tiderthawng tiin a sawi.
Colombian President Gustavo Petro chuan flotilla-a Colombian chuang ve pahnih man an nih avangin Nilaini khan an rama Israel-in palai a dah zawng zawng a hawtir a. Israel hian nikum atang khan Colombia-ah hian ambassador tak chu a nei tawh lo thung.
Petro-a hian an mi an man chu Israeli Prime Minister Benjamin Netanyahu-a’n khawvel dan a bawhchhiatna thar ber nia sawiin chhuah nghal a phut a. AN ram hnih inkarah free trade agreement a titawp nghal bawk.
Malaysian Prime Minister Anwar Ibrahim-a pawhin Israel-in flotilla a dang chu demin sipaiten Malaysian pariat an hreng tih a sawi.
“Mi puih tumna a dang hi Israel hian Palestinian mipuite dikna chanvo chauh a rap bet lo va, khawvel ngaihdan kalhin a che a ni tih a lantir,” tiin Muslim rama rorel mek, Anwar-a chuan a sawi.
Israel-in flotilla a dang hi Italy leh Colombia-ah chuah duh lohna lantir a ni a. Italian pawl hrang hrang chuan Zirtawpni hian puihna phur flotilla an thlawpzia lantir an tum bawk.
Israel-a lawng sipaite erawh chuan flotilla hian indona hmun daiin an dan thin kaltlang an tum tih an sawi a, an kawng thlak turin an ti a. An puihna kente chu kawng him zawka Gaza-a luhpui dan tur pawh an kawhhmuh.
Flotilla uaihawttute chuan Nilainia dan an ni hi ‘indonaa dan bawhchhiatna tling’ niin an sawi a. Sipaite hian na taka beiin tuiin an phuh niin an sawi a, tumah na erawh an awm lo.
“Lawng tam tak dan lova lo dan niin Israeli Occupation Forces-in tu tuipui mah ni lovah an tibuai,” an ti.
Lawngte hi indona hmun atanga tuipui mek 70 chuanga hla, Israel-in he hmun atanga pantu lawngte a danna hmunah dan an ni.
Flotilla-te hi dang lo sela chuan Ningani tuka Gaza thleng tura ngaih an ni.
Israel hian kum 2007-a Hamas-in Gaza Strip an thunun atangin tuipui atanga luhna a dang vek a, a hma pawhin tuipui atanga puihna pek luh tum hi an lo ang tawh thin.
Israel hian Gaza hi October 7, 2023-a Hamas-in an ram beia mi 1,200 vel an thah leh hren tura mi 251 an hruai atangin an bei tan a. Tun thlengin mi 66,000 chuang an thi tawh a ni.
Israel-in Gaza puihna tur phur lawng 13 dang
