Israel in Iran beih ngei tumin thutlukna a siam tawh

Israel in Iran beih ngei tumin thutlukna a siam tawh
Israel chuan an thenawm Iran beih ngei tuma thutlukna an siam tawh thu prime minister Benjamin Netanyahu chuan a sawi.
Israel hian kawng engkimah US puihna dawngin, an inthlawp tha hle thin a, tuna Hezbollah nen an indo meknaah pawh hian US chuan theihtawpin a lo tawiawm tawh a ni. Mahse, Israel PM in thuchhuah a siam tharah chuan Iran beih ngei an tum thu sawiin, US thusawi chu a lo zawm fo tawh thin nimahse, tun tum bik erawh an ram chhung khawih bik ngawih ngawih a nih avangin thutlukna chu an siam a tul thu a sawi a ni.
October ni 1 khan Iran chuan engmah sawi lovin Israel ram lamah hian missile a kap nghek mai a, hun rei fe chhung chu Israel hian chhang let lovin a ngawi reng a ni.
US chuan Israel chu hemi chungchangah hian an thenawm ramte be tur leh inremna sawipui turin thurawn a pe a, a tul chuan palai hnathawhsak pawh an inhuam thu an lo sawi tawh a ni.
Mahse, Israel chuan hemi pawh hi chhang chuang lovin a ngawi reng a, reife a ngawih hnuah nimin khan Israel PM chuan an ram hnukkhawih thil a nih avangin tuma thurawn an lak loh tur thu leh anmahni chinfel tur a nih thu a sawichhuak ta a ni.
Prime Minister Benjamin Netanyahu chuan, ‘US in min duhsakna leh min tanpuina zawng zawngah hian kan lawm hle a, mahse anni hi inthlan hmabak an ni a, an ramchhungah boruak tha lo zawk a awm loh nan hetiang hian an ti a ni mai thei. Tin, Iran atang hian an oil lakluh hi a tam tham em em a, hemi tihtawp hi an hlau a ni thei bawk,’ tiin. ‘Keini chuan chutiang thil chu kan hlau ve lo a, thutlukna chu kan siam fel tawh,’ a ti.
Israel in Iran an beih let dan tur chungchangah hian thutlukna an siam fel tawh thu sawi mah se, engtinnge an chhan let dawn tih leh an chhan let dan tur leh hun tur chu an sawi chuang lo a, an la buai chho rih zel dawn a nih hmel.
Tin, US hian Israel in Iran hi a beih let chuan indona nasa zawk a chhuak ngei dawnin an hria a, Iran hi nuclear ralthuam nei ram an nih bawk avangin an hman mai an hlau a, Israel hi khap beh dan an zawng hram hram zel a ni. Mahse, Israel chuan US thurawn hi zawm an tum loh rih hmel hle.