Israel-in Lebanon a kahnaah mi 12 vel thi
Lebanon khawchhak lama Bekaa Valley-ah Israeli thlawhnaten mi 12 vel an kap hlum niin region governor-in a sawi.
Baalbek-Hermel Governor Bachir Khodr-a chuan Wadi Faara kahnaah chhungkaw khata mi panga telin Syrian pasarih leh Lebanese pathum an thi tih X-ah a tar lang a. Shmustar-ah mi pahnih an thi bawk niin a sawi.
Israeli sipaite hian hel pawl, Hezbollah sipai compound bakah Radwan Force training camp-te an kap a ni.
Tun tum hi kum khat an indo hnua Israel leh Hezbollah ten inkahhai an puan hnua beihnaa thihna a thlen tam ber tum a ni a. An indo chhung khan thla hnih lek na zawka an beihnaah hel pawl hi an inchân nasa hman hle a ni.
Hezbollah chuan engmah thuchhuah an la nei lo va; mahse, an hnuaia Al-Manar TV channel erawh chuan inkahhai leh Lebanon-in inrelbawlna hran a neih bawhchhiatsakna a ni tih a puang thung.
Arabic tawnga Israel Defense Forces (IDF) thupuangtu, Lt Col Avichay Adraee-a chuan Thawhlehnia an beihnaah hian Hezbollah an kap fuh nasa hle tih X-ah a tar lang.
“Radwan Force ta sipai compound, mi firfiak awmna hmun atana an hman leh Hezbollah-in ralthuam nana an chhek hmun chu kah fuh tel a ni,” tiin a sawi.
Radwan Force hi Hezbollah-in commando unit an neih that ber a ni.
IDF hian saptawnga thuchhuah dang an siamah September, 2024 khan Radwan Force-a an commander-te chu Hezbollah beia Lebanon chhim lam an beih tum khan an that teuh va, tunah hian ‘beihpui thlak thei turin an intung nung leh tan’ niin an tar lang.
IDF hian Hezbollah-in Bekaa Valley-a ralthuam an chhek leh sipai an chet tlattir chu ‘Israel leh Lebanon inkara inrintawnna bawhchhiatna chiang tak leh nakin zela Israel sorkar tana hlauhawm la ni thei tur’ a nih thu an sawi bawk.
Israeli Defence Minister Israel Katz-a chuan Thawhlehnia an chet thar lehna hi Hezbollah leh Lebanese sorkar hnena Israel chu Hezbollah sipaite ‘intun din thar leh an tumna chu sipai chakna hmangin na taka an chhut nghal zel tur thu’ hrilhna a nih thu a sawi.
November thla khan US palaina hnuaiah Israeli leh Lebanese sorkar chuan inkahhai an puang.
Inremna ang chuan Hezbollah hian Israeliramri atanga km 30 vela hla, Litani River hmar lam an tanhmun an chhuahsan vek a ngai a, an awmna thinah Lebanese sipai leh United Nations peacekeeper-te an awm thung ang.
Israel pawhin Lebanon-a an sipaite la chhuakin chhim lama hmun pawimawh bik hmun ngaah chauh an awm zui thei ang.
Israel-in Lebanon a kahnaah mi 12 vel thi
