Israel-in Lebanon-ah tiam chin neia che turin sipai luhtir

Israel-in Lebanon-ah tiam chin neia che turin sipai luhtir
Israeli sipaite chuan an sipaiten Lebanon chhim lama Iran thlawp ralthuam keng pawl, Hezbollah lakah ‘khawmualah tiamchin leh bitum bik neiin beihpui an thlak’ tan tih an sawi.
Sipaite chuan tun hnai ni eng emaw zat chhung khan Israel ramri hnaiha awmte venhimna nen ‘Hezbollah chakna hmun pawimawh tak takte’ beih an nih thu an sawi.
Israeli indo thlawhnate chuan Lebanon chhim lama khawpui leh khaw hrang hrang an bei chhunzawm a. Sorkar chanchinbute chuan Thawhtanni khan damdawia thawk pahnih nen mi pasarih an thi niin an tar lang.
Israel-ah pawh Hezbollah-in missile leh rocket-a an kah avangin siren a ri a, thi leh hliam erawh an awm lo.
Lebanon hi chawlhkar hnih kaltaa Israel, US leh Iran inkara buaina chhuakah a lut ve a, Hezbollah hian Iranian supreme leader thah phuba lak nan Israel-ah rocket leh drone a kap a, kum 2024-a inkahhai puan a nih hnuah an inbe thar leh ta a ni.
Israel chuan Hezbollah-in an beih atang hian an laka beihpui thlak thar leh hi a tul a, an ralthuam an dah vek loh a nih chuan chhunzawm zel an tum tih an sawi.
Lebanese thuneitute chuan Israel-in beihpui thlaknaah mi 850 an thi tawh a, an zingah hian naupang 107 an tel tih an sawi.
Lebanon chhim lamah an sipai pahnih an thi tawh niin Israeli sipaite chuan an sawi ve bawk.
Israel Defence Forces (IDF) chuan Thawhtanni tuk khan thuchhuah siamin 91st Division sipaite Lebanon-ah an che tan tih an tarlang.
“He hnathawh hi hma lam panna tur venhimna kawnga hmalakna zau zawka tel a ni a. Firfiak hmunhma tihchhiat leh an hnathawkte tihbo a tel a, hei hi hlauhawm tihbo a nih theih nan leh Israel hmar lama chengte tana venhimna dang siam belh a nih theih nan a ni,” an ti.
IDF thupuangtu, Lt Col Nadav Shoshani-a chuan Shia Islamist politic leh sipai pawl, UK leh US tela ram enge maw zatin firfiak pawl anga an chhal, Hezbollah hian Lebanon chhim lamah ‘insawh ngheh thar an tum’ tih a sawi. A sipai tha bik, Radwan Force fighter za tam tak tir chhuakin ni khatah rocket za tam tak a kap thin niin a sawi bawk.
Hezbollah chuan Thawhtanni khan an fighter-ten Israel ramri khawpui, Kiryat Shmona-ah missile leh drone an kap tih a sawi.
A hma zanah Lebanon ramri khawpui, Aitaroun-a Israel sipai hmun an kap a, Israel ramri khawpui, Margaliot leh Yuval-a Israel sipaite awmna hmunah rocket an kap bawk tih an sawi.
UN Secretary General António Guterres-a chuan ‘Lebanon mipuite hrehawm tawrhna rapthlak tak’ tihtawp nan inkahhai turin a ngen.
Kar tawp khan Reuters news agency leh Israel chanchinbu, Haaretz chuan Israel leh Lebanon chuan ni rei vak lo hnuah remna zawnga inbiakna nei turin an inbuatsaih mek tih an sawi niin an tar lang.
France President Emmanuel Macron-a’n Paris-a inbiakna neihpui turin a inpeih tawh tih a sawi bawk.
Axios chuan France hian inkahhai puan leh Hezbollah ralthuam lek tihtawpna tura inbiakna neihna turah ruahmanna chipchiar tak a nei tih a tar lang a, hetah hian Lebanese sorkarin Israel chu a pawm a ngai dawn a. Israel leh US chuan he rawtna hi an zir chiang mek niin a tar lang bawk.
Hetih lai hian Haaretz vek hian Thawhtanni khan thu dawn tar langin Israel hi ruahmanna awm sa atanga inhnukdawkin inbiak pawh sawn a ni.