Israeli war cabinet member Benny Gantz chuan Hamas tena March 10 hmaa Israeli an man an kawl mek te an vaia an chhuah zalen lo a nih chuan Israel chuan Rafah a run tur thu a sawi.
Hei hi Israel-in a sipai tena Gaza southern city mipui bit em em na luhchilh a tum dan kimchanga a sawi tum khatna a ni.
Rafah ah hian Palestinian 1.5 million vel cheng mekin bit takin an khawsa mek a, khawvel ram hrang hrangte chuan Israel chu Rafah luhchilh lo turin an ngen a ni.
Hetihlai hian UN public health agency te chuan Gaza damdawi in te chu Israel in a beih hnuah a che hleithei tawh lo tiin an sawi a.
World Health Organization (WHO) te chuan Rafah hmarlam Khan Yunis a Nasser hospital chu enfiah tura kal an tum chu phalsak an ni lo tiin a sawi a.
Israel Defence Forces (IDF) te chuan he damdawi In complex hi karkalta Ningani khan luhchilhin damdawi in ah hian Hamas tena Israeli an rukbote an dah nia intelligence report an dawn vang tiin an sawi a.
IDF te chuan Nasser damdawi in chu fimkhur taka an luhchilh thu sawiin chutihrual chuan Hamas te chu damdawi in te lehzel pawh firfiakna thila hmang duh tiin a puh thung.
Israeli war cabinet member Gantz chuan, “Khawvel leh Hamas leader tena an hriat tur chu Ramadan hma in Israel mi tang te chhuah an ni lo a nih chuan inbeihna khawi hmunah pawh a thleng ang a, Rafah ah pawh a thleng ang” tiin a sawi.
Ramadan hi Islamic holy month niin kumin hian 10 March atangin a intan dawn a, Muslim te chuan chaw nghei in an la urhsun hle a ni.
Gantz chuan Israel chuan awm ze nei taka chet la in civilian te chhuah zalen phawt mai bakah civilian tena an tawrhloh theih dan ang ber tur hisapin American leh Egyptian thian te nen inbiakna neia kalpui a ni ang tiin a sawi bawk.
Israel war cabinet ah hian top security officials te an tel a. Hamas tena 7 October, 2023 a Israel ramri kana Israeli 1,200 chuang kaphluma mitang 253 an lak hnua din a ni a. Hamas te hian Israel mitang 130 vel an la kawl mek anga ngaih a ni.
Ramadan thlen hma in kar thum chauh a awm tawh a, hetih lai hian Rafah a cheng tam tak te chuan khawthlang tuipui kam lam an pan mek tawh a, tam tak te erawh thutlukna siam thei lovin an la awm tia sawi a ni.
Khawvel ram hrang hrang ten an nawr viau chungin Israeli Prime Minister Benjamin Netanyahu chuan Rafah a Hamas te nuaichimit turin luhchilh an tum thu a puang zui tho a ni.
Egypt leh Arab ram te chuan Rafah beih a nih chuan Palestinian tam tak ten Egypt an lut ngei dawn tia sawiin chu chu pawmtheihloh an ti a. Saudi Arabia chuan Rafah beih a nih chuan nghawng chhe tak a nei dawn tiin Israel a vau lawk bawk.
Khawvel ram dang te pawhin Israel chu Palestinian te rethei taka an awm mekna Rafah chu luhchilh lo turin an ngen bawk a ni.
Indona avangin Palestinians 28,400 chuangin nunna an chan tawh a, heng zinga a tam ber chu hmeichia leh naupang te an ni a, hliam tuar 68,000 chuang an awm tawh bawk niin Hams-run health ministry chuan a tarlang.
Gaza a inbeihna a thlen mek lai hian Israel leh Hamas aiawh te chuan Qatar hmalakna in Egypt khawpui Cairo ah inbiakna an nei mek reng thung a, mahse, hmasawnna a awm chak lo hle thung.
Israeli prime minister Benjamin Netanyahu chuan Qatar hmalaknaa inbiakna neihah US Presient Joe Biden an palai tir tura a ngenna avanga tir a nih thu a sawi a. Mahse, Hamas tena phut an neih te chu awm ang lo lutuk tiin a sawi a. Hamas te pawhin inkahhai a awm theihlohna chhanah Israel an puh bawk.
Israel-in March 10 thleng nghak dawn
