Yemen-a Houthi rebel movement chuan prime minister-a inchhal, Ahmed Ghaleb Nasser al-Rahawi-a chu kar kal ta tir lama Israeli thlawhnain a beihnaah a thi tih an puang.
Iran-in a puih pawl hian Ningania Israel Defense Forces (IDF)-in Yemen khawpui, Sanaa an beihnaah khan an mi pawimawh tak tak dangte pawh an thi tel tih an sawi.
IDF pawhin Rahawi-a leh Houthi-a mi langsar tak takte chu an indo thlawhnain Sanaa an awm khawmna a kah fuhah ‘an dah bo’ tih an puang bawk.
Houthi-te hian kum 2014-a khawvelin a pawm Sanaa-a sorkar an paih thlak hnuah Yemen hmarthlang hmun zau zawk an thuhnung mek a, sorkar nena inbeiin tual chhung indona nasa tak a chhuah phah.
Houthi hian an prime minister rual hian Houthi minister dangte pawh an thi tih an sawi a, an hming erawh an sawi ve lo thung.
Saudi Arabian news site al-Hadath chuan Houthi sorkara foreign minister bakah, justice, youth & sports, social affairs leh labour minister-te an thi tel niin a tar lang.
Houthi President Mahdi al-Mashat-a pisa chuan minister dang tam takin kahna avang hian ‘hliam na deuh leh tenau deuh’ an tuar hlawm niin a puang thung.
Rahawi-a a thih avang hian a deputy prime minister, Muhammad Ahmed Miftah-a’n a a ai a awh rih mek bawk.
Rahawi-a hi August, 2024 atanga prime minister niin an movement-a langsar tak niin sipaite chet lakna tura thutlukna lian siamtu pawimawh tak a ni.
Ningania beih an tawhah hian an pawla an hruaitu lawk ber, defence minister leh chief of staff nihna chelh mektu, Abdul-Malik al-Houthi-a a thi tel em tih erawh hriat a ni lo.
IDF chuan Inrinni tlai tawh tak khan thuchhuah siamin beihna kha an awm khawm tih thu an dawn atanga ‘darkar reilo te chhungin’ an ti tih an sawi a. Thil thleng kimchang chu an ngaihven zui mek tih an sawi bawk.
Gaza-a Israel leh Hamas an indo atangin Houthi-te hian Israel leh Red Sea leh Gulf of Aden-a sumdawng lawngte chu missile-in an kap reng a, hei hi Palestinian-te an thlawp tih an lantirna niin an sawi.
Israel hian thlawhna hmangin Yemen-a Houthi-te awp chin an kap ve zel bawk a, hei hi Houthi-in mi an beihna tihtawpna tur niin an sawi.
Kar hmasa khan Israel hian Sanaa-a Houthi awmna hmunte a kap leh a ni.
Israel-in Yemen-a Houthi hel prime minister that
