Dr. C. Lalrampana
Israel Knesset (Parliament) inthlan dan hi Mizoram bik tan hian tih ve theih ni se a tha ngawt ang. Mahse, India Parliament-in Constitution Article 81; 170 & RPA 1951 a tihdanglam vek a ngai dawn si!
Israel-ah Parliament chu Knesset (כנסת) an ti a. Knesset chu India Parliament ang bawkin ram rorelna leh dan siamtu a ni. Mahse, India angin constituency tin atanga MP pakhat emaw, USA anga President thlan ang emaw a ni lo. Israel-ah chuan mipuiin political party an thlang a, party-in vote an hmuh zat azirin Knesset member (MK) seat an nei thin. He electoral system hi Proportional Representation an ti.
Israel Parliament-ah member 120 an awm a. An term chu kum 4 chhung a ni a, mahse, a hunbi thlen hmaa Knesset thiah a nih chuan inthlan tharna (mid-Term Poll) neih theih a ni.
Mipuiin party an thlang. Inthlan niah Israel khua leh tui dik tak kum 18 chinin vote an thlak thei. Ballot paper-ah party list emaw, party hming emaw an thlang a; candidate pakhat hming chauh vote an pe ve lo. Vote zawng zawng chhiar a ni a, Party tinin vote an hmuh zat chhiar a ni. Israel ram pum hi constituency pakhat angin ngaih a ni; constituency hrang hrangah seat sem hran a ni ve lo.
Vote hmuh tam dan tehkhawng a awm. Vote 3.25% threshold hmuh phak a ngai. Party-in vote dik, vote nung zawng zawng zinga 3.25% tal a hmuh a ngai. Hei hi a hmuh phak loh chuan Knesset seat a hmu thei lo. Vote zat azirin seat sem a ni. Party-in vote a hmuh tam poh leh seat a hmu tam thei tihna a ni. Entirnan: vote nung/dam zawng zawng zinga 10% a hmuh chuan seat 120 zinga seat 12 vel a nei thei tihna a ni. Threshold leh seat sem dan avangin chhut dik chiah dawn chuan a la danglam thei.
Party pakhatin Absolute majority a neih theih loh pawhin sorkar a siam thei tho.
Seat 120-ah majority chu seat 61 a ni. Party pakhatin seat 61 a neih loh chuan party dangte nen thawk hovin sorkar din an tum thin. Hei hi coalition government tihna tho a ni. Majority support nei sorkar din a ngai tihna a ni. Sorkar din turin coalition party-te chuan Knesset member 61 emaw, a aia tam emaw thlawptu (supporter) an neih a ngai. Prime Minister chu President-in a appoint a, sorkar din theihna turin Knesset thlawpna a ngai. Vote an hmuh atanga seat an sem dan Knesset seat 120 chu party-te vote hmuh zat azirin an sem a. A hnuaia hi entirna dah chhin a ni; inthlan result dik tak ni lovin entirna mai a ni.
Party-in Vote an hmuh dan mila Seat an neih theih dan:
Party A 40% seat 48;
Party B 30% seat 36:
Party C 20% seat 24;
Party C 20% seat 24;
Party D 10% seat 12
Total 100% seat 120.
Hei hian party pakhatin vote hmu tam ber mah se, sorkar a siam nghal thei ngawt lo tih a entir. Party ‘A’ chuan seat 48 a nei a, majority seat 61 erawh a hmu phak lo. Chuvangin, Party dangte thlawpna a la mamawh tihna a ni. Israel-ah mipuiin candidate tin hmingah vote an thlak ve lo. Party tin chuan candidate list an buatsaih a, party-in seat an dawn zat azirin list-a hming indawt dan ang zelin candidate-te chu Knesset-ah an lut thin. Entirnan, Party A-in seat 10 a hmuh chuan a list-a candidate hmasa ber 10-te chu Knesset member an ni nghal ang. Party tin candidate list buatsaih dan erawh a inang vek lo; party member-te vote-a thlan, party committee-in a thlan emaw, party hruaitute’n an thlan emaw a ni thei.
Prime Minister chu engtin nge an thlan? Israel-ah Prime Minister chu mipuiin a hmingah direct-in an vote ve lo. Mipuiin Knesset inthlanah party an thlang a, Vote result azirin party tinin seat an hmu thin. Party-te chuan sorkar din theihna turin coalition an siam thin. President chuan sorkar din thei tura ngaih party hruaitu chu sorkar din turin a sawm thin. Sorkar din tur chuan Knesset member-te support a neih a ngai. Chuvangin, party pakhatin vote tam ber a hmuh mai avangin Prime Minister a ni ngei dawn tihna a ni chuang lo. Majority support nei thei tura coalition siam theihna hi a pawimawh ber chu a ni.
India-ah chuan constituency tinah candidate-te an intihsiak a; Israel-ah chuan ram pum huap party list-ah vote an thlak thung. Israel Knesset inthlan danin party-te vote an hmuh zat azirin Parliament-ah an chanvo a sem a. Party pakhat chauh majority a neih loh chuan party dangte nen sorkar an din a ngai. Hei hi Israel democracy-a thil pawimawh tak a ni.
Israel Knesset inthlan dan anga kan tih ve theih nan kan State Assembly-ah “Keini Mizoram-ah chuan PR System emaw kan state mil emaw hman ve kan duh” tiin Assembly House-ah Resolution siam se. Chu chu Article 327 leh 328 hnuaiah state-in central-ah ngen theihna a neih angin theihtawp chhuahin ngen se. India-a inthlan dan zawng zawng hi Constitution-ah a inziak sa a: Article 324-329 – Election Representation of the People Act, 1950 & 1951 khawih buai si lovin kan ran state tan bik tal siam theih ni se a tha ngawt ang. Heng hi Union List/Central Law a ni. State-in amahin a thlak danglam theih loh thil a nih avangin a sakal te tein hma la se a tha ngawtin a rinawm. Chutianga thlak danglam a nih chuan State resolution chu Governor hmangin President/Home Ministry/Law Ministry-ah a kal ang a, Lok Sabha + Rajya Sabha-in Act siam that hnuah President-in a sign ang a; Inthlan dan danglam bik kan nei ang a, a tihzia ngawt ang.
Mizoramin Israel Election System-a kan inthlan ve theih chuan mimal candidate tu emaw vote bik lovin Party kan duh zawng theuh kan vote ve tawh mai dawn a, mimal candidate-in vote a lei thin ang hi Israel PR (Proportional Representation)-ah hian vote lei/hralh a awm lovang. A chhan chu bial hran a awm lo. India angin MLA bial bik a awm lo. Israel ram pum hi bial 1 chauh a ni. Candidate malin khaw pakhatah vote a lei thei lo, ram pum huap vote maktaduai a ngai.
Mi malah vote a tla lo. Party-ah vote a tla. Mi pakhat lei khan party pumpui tan vote pakhat chauh a ni. India angin “ka bialah vote 500 lei ila ka tling ang” a tih theih loh.
List system : Party-in mi 120 list an siam lawk. Miin a vote khan mi mal sumdawng ni lovin party ideology a vote a ni. A thatna dang leh chu Vote a thlawn lo. Party ten 3.25% an hmuh phak chuan seat an hmu vek thei. India angin vote 40% hmuh pawha a tlin loh chuan vote zawng zawng thlawn ang kha a awm ve lo. Party tenaute pawh an lut ve thei. Arab party seat 5, Orthodox party seat 7 angte pawh an lut thei. Minority aw (voice) a awm ve thei. Sum hman a tlem bawk. Candidate malin poster, sum sem a ngai lo, party central-in an campaign mai zawk thin. MPF leh party campaigner-te zanlaia an inum kual zak zak ang hi a awm ve ngai lo.
India FPTP inthlan dan vote hmu tam ber seat hmu hnem ber tlinga puan hi sorkar erawh a nghet deuh. Mahse, Anti defection law awm vang chauh a ni.
Israel PR Ram pum huap party thlan hi vote a thlawn lo, mahse, sorkar a nghet thin lo. Vote lei pumpelh nan chuan PR hi tha zawk mah se, sorkar nghet din nan chuan FPTP a tha zawk. FPTP India hman mek a thatna chu bial tin MLA/MP bial mipuite nen kan inhnim hnai, bialtu tunge kan inhria. Sawrkar siam a awlsam, majority a awm rang. Ram lian, hnam hrang hrang tan a tha, bial tenaute au aw a hriat theih. Mahse, Vote thlawn a tam – 30% a tlin chuan 70% vote kha a thlawn thei. Vote lei/sum hman a tam duh, bial khat chauh thlem a ngai.
PR Israel hman mek a thatna chu Vote thlawn a tlem, vote 10% i hmuh chuan seat 10% a hmuh theih.
Party tenaute pawh an lut ve thei. Vote lei a har, ram pum huap a ni a, mi pakhat lei ringawtin awmzia a nei lo.
A that lohna erawh Bial hran bik a awm lo, kan aiawhtu bialtu kan hre lo. Party 10-15 lut ta se sawrkar siam a har, inrem a har, kum 1-2-ah sawrkar a tlu leh thin. Israel-ah hetiang hian kum 4 chhungin vawi 5 inthlan an nei tawh.
Party hotuin list a siam a, mipuiin candidate an thlang thei lo.
Mahse, Mizoram state bik tan PR system hmang dawn ila chuan Indian Constitution 10th schedule 1985 bakah sorkar siam tawh chuan inhnuh dawh leha sorkar namthluk chhen tur danna dan belh zeuh a ngai ang.
Hetiang hian Israel pawh hian dan nei tel se chuan MP term khat chhunga inthlan nawn chhen a ngai hauh lovang.
Ram lian tan chuan FPTP a nghet zawk. Ram te, mipui tlem, ngaihdan hrang hrang zah vek duh tan chuan PR a felfai zawk. Chuvangin, India ang ram lian tan FPTP hi an la duh rih, Israel ang ram te tan PR hi a inmil zawk. Chutiang bawkin kan state tan bik liau liau PR hman ve theihin kan state milin Dan hran nei thei ila chuan a felfai zawk ang a, senso a tlem daih zawk bawk dawn a ni. Chuvangin, 2028 inthlan lo awm leh turah PR hman ve theih nana hma la ngam tur sorkar kan thlir thiam a hun ta hle a ni.