Istanbul-a Israel consulate bula inkahnaah mi pakhat thi

Istanbul-a Israel consulate bula inkahnaah mi pakhat thi
Istanbul-a Israel consulate bula inkahnaah silai keng pakhat a thi a, mi pahnih an hliam bawk a, Turkey President Recep Tayyip Erdogan chuan ‘firfiaka chetna rawng tak’ tiin a sawi.
Inkahnaah hian police pahnihin ‘hliam tenau an tuar’ tih Turkey Interior Minister Mustafa Ciftci-a chuan a sawi.
Ciftci-a chuan pawikhawihtute hi Izmit khawpui atanga atangin Istanbul-ah car an hawh hmanga kal an nih thu sawiin an zinga pahnih chu unau an nih thu a sawi.
X-a thuchhuah an siamah interior ministry hian silai keng thah hi Yunus E.S. tiin a tar lang a, ‘sakhaw hmanga firfiak pawl nena inzawm’ a nih thu a sawi.
‘Firfiak pawl’ an tih hi Islamic State sawina a nih tih hriat a ni a; mahse, eng pawl mahin he thil thlengah hian an inhnamhnawih thu an la sawi lo.
Erdogan-a chuan, “Tun anga Turkey rama rinna boruak hi tihchhiat kan phal dawn lo,” a ti.
Police-te chuan a tirah pawikhawihtu pahnih an thi tih an sawi a; mahse, a hnuah governor Davut Gul-a chuan pakhat chauh thi a nih thu a sawi leh a ni.
Hliam tuar pahnihte hi Onur Ç leh Enes Ç te an ni a, interior ministry chuan unau an nih thu a sawi.
Ministry thuchhuah chuan silai hmehpuahnaa hliam tuar police pahnihte hi nunna atana hlauhawm dinhmunah an ding lo tih a tar lang a, pakhat chu a keah kah a ni a, pakhat chu a bengah kah a ni.
“Firfiak pathumte hi digital hmangin an inbe nasa tih hriat a ni a, an zinga hliamte hi thu zawh fiah zui zel a ni,” a ti.
Governor Gul-a chuan thuthar thehdarhtute hnenah pawikhawihtute hian silai leh pistol an hmang tih a sawi.
Consulate-ah hian Israel palaite an loh thu a sawi bawk a, Istanbul-a main district lun lai, Besiktas-a awm a ni.
Inkahna hi Thawhlehni chhun ên laia thleng a ni a. Social media-a video-ah silai nena beitu pakhat chu police-ten an kap a, a tlu zui.
Reuters news agency chuan a hretu pakhat sawi danin silai ri hi a nasa hle a, ‘minute 15-20 chhung’ a vel a nih thu a tar lang.
Online-a video darhah police van leh police tam tak an lang a, inkahna thlen hnu darkar eng emaw zat consulate building hi an hual.
Tunah hian Turkey-ah Israeli palai an awm lo va, kum hnih leh a chanve kalta chhung consulate a khar a ni tawh a, Gaza-a indona avanga Ankara leh Tel Aviv inlaichinna a chhiat zel vang a ni.