Italian Mafia boss Matteo Messina Denaro, kumin kumtir lama man a nih hma zawnga Italy a most-wanted ni reng chu a thi.
Kum 61 mi niin Cosa Nostra Mafia pawl dintu leh boss a ni a, kum 30 chuang man tuma veh a nih hnuah January thla khan man a ni.
Man a nih laiin cancer natna vei mek niin damdawi Inah enkawl zui nghalin thla kalta khan damdawi In atangin lung inah lak leh chauh a ni.
Denaro hi mi tam tak tihhlumnaa inhnamhnawiha puh a ni a. Kum 1992 khan anti-Mafia prosecutors Giovanni Falcone leh Paolo Borsellino te thah avangin thubuai siamsak niin insawi thei em em zuiin a mi thahte chu ‘thla khat daih’ an ni tawh ang a ti vel zui bawk.
Cosa Nostra hmangin sualna kawng hrang hrang dan kalha chetna hrang hrang kalpuitu a ni.
Kum 1993 atang khan tlanchhia in Messina Denaro hian biru chungin a hnuaia mite chu hmun hrang hrang atangin thupek pe-in a buaipui zui reng tho a ni.
Local media-te chuan kar kalta Zirtawpni atang khan central Italian city L’Aquila a enkawl a nihnaah nikhaw hre lovin a awm tan tiin an sawi.
An cancer kaihhnawihah tun hnaia zai tawk a ni bawk a, zai a tawh hnuhnun ber hnuah a la tha chhuak chiang hlei thei lo tia sawi a ni bawk.
L’Aquila Mayor Perluigi Biondo chuan Denaro thihna chungchang hi twitter hmangin a puang zui a ni.
Denaro hi Coasa Nostra ‘secret keeper’ hnuhnung bera ngaih niin, information pawimawh leh mimal hming pawimawh tinte hre vektu tiin an sawi a ni.
Kumin January thlaa man a nih dawn pawhin Sicily capital Palermo a private clinic-a a inentir lai niin armed forces 100 chuang lai hman hial a ni.
Denaro man tum hian Italian police-te chuan tum tam beihpui an thlak a, kum 2013 khan an man thei lek lek a, mahse hlawhchham lehin a unaunu Patrizia leh a thuihhruai tam takte erawh an man phah a ni.
Mahse, police te chuan a sumdawnna kaihhnawih pawimawh tak takte an chhuhsak avangin dinhmun derthawng takah dahin a awm zui ta a. Amah man tumna lamah police te chuan September 2021 khan Liverpool khaw chhuak Formula 1 fan chu amah emaw tiin an man mualpho vak tawh bawk.
Italian mafia boss lawk Denaro thi
