Footballer-te hian an eizawnna ramah danin a phut anga chhiah an pek tur thup thenin chhiah an awl ru fo a, manchhuaha hremna pek leh chawitir pawh an awm ve reng a; Argentina leh Napoli legend Diego Maradona pawh kha November 2020-a a thih hnu thleng khan Italy rama a inkhelh laia a chhiah awlruk an chhui a, mahse, tunhnai khan Italy supreme court chuan an rama a chhiah pek loh nia an puhnate chu ngaidamin, an thaibo ta a ni.
Maradona chhiah awlruk chungchanga investigation kalpui a nih laiin kum 1990 bawr chho tir lam atanga a chhiah awl an chhiar tan a, an han belhkhawm hnuah euro maktaduai 37 (USD 40.38 million) pek tur a nei tih an chhuichhuak a; Italy a tlawh laia a bungrua an hrensak a awm bawk a, chu pawh chu Italy rama court sangber hian a chhuahzalen a, kum 30 teh meuh awh ex-Napoli striker leh revenue thuneitute inkara chhiah awlruk thubuai behchhana inbeihna chu a tawp fel ta a ni.
Hming lema El Pibe de Oro emaw Golden Foot emaw tia an koh leh sawi thin Maradona an puhnaah chuan Liechtenstein khawpuia company-te chu kum 1985 leh 1990 chhunga a thlalak hralhna man atanga Napoli hnen atanga a sum lakluh thupna hmanruaah a hmang tih a ni a, hun rei tak thubuai ngaih-tuah a nih hnuah a thihsan ta a, a kalbo hnuah court-in aleiba thing zui lo turin thutlukna a siam ta a ni.
A ukil rawih thin Angelo Pisani chuan thubuai lak atanga an zalen tak thu sawi chungin hlauhna leh timna nei miah loin Maradona kha chhiah awlruk ching mi a ni lo tih a sawi nawn leh nghe nghe.
Tarlan tawh thin angin, kum 2020 November thla khan heart attack avangin Maradona kha a thi a, a club hlui Napoli leh a ropui thinna Argentine national team fans tam takin ‘god of football’ tia pathian biak taka an biak thin chuan leiba euro maktaduai tamtak neia puhna awm chungin mual a liam a, a thih hnuah a zalen ta chauh a ni.
Italy court-in Maradona chhiah pek loh thaibo
