Ningani zan khan Davis Cup quarter-final khelh zawh a ni a, champion lai Italy in Argentina lehthalin semi-final an lut. Inkhel dangah USA hnehtu Australia in semi-final an lut ve bawk.
Champion lai Italy hian Argentina lakah bul an tan tha lo va, hnufual zawk an ni hmasa. Italy tan mimala inlan hmasa ber Lorenzo Musetti chuan a khingpui Francisco Cerundolo chu a hneh lo teh tlat. Cerundolo hian Musetti lakah hian 6-4 6-1 in hnehna a chang a, Argentina in pen khatin semi-final an hnaih.
Musetti a chak loh hnu hian World No. 1 Jannik Sinner chu Italy tan a inlan zui ve leh. ATP Finals-ah a champion hnu lawka inlan zui ve leh Sinner hian Argentina aiawha inlan Sebastian Baez chu awlsam tak; 6-2, 6-1 in a hneh a, 1-1 niin doubles match hmangin semi-final lut zawk tur chin fel a ngai.
Doubles-ah hian Italy tan Jannik Sinner leh Matteo Berrettini te inkawp chuan Maximo Gonzalez leh Andres Molteni te inkawp an hmachhawn. Semi-final lut zawk nih ngei tumin an inbei nasa viau a, inkhel hmuhnawm takah Italy in hnehna an chang.
Champion lai Italy tan Sinner leh Berrettini te hian set khatnaah break pawimawh tak an neih a, game li hloh chungin set an la. Set hnihnaah Argentina in chak tumin tan an khawh nasa viau naa hun pawimawh takah an serve an hum zo lova, set hloh nawn lehin Italy lakah hian 4-6, 5-7 in an tlawm zui ta a ni. Argentina lakah harsa taka hnehna chang Italy hian semi-final ah USA hnehtu Australia an hmachhawn zui leh ang.
Italy laka fiahna hautak hmachhawn tur Australia hian bul an tan tha a, set la hmasa zawkah an tang. Australia tana inlan Thanasi Kokkinakis leh USA tana inlan Bel Shelton ten inkhel hmuhnawm tak an lantir a, an inhnehtawk hle. Inkhel hmuhnawm takah hian Kokkinakis hian 6-1 4-6 7-6 (16-14) in hnehna a chang thei hram a, Australia in 1-0 in hma an hruai phawt.
Hnufual zawk an nih hnuin USA tan Taylor Fritz a inlan zui ve leh. ATP Finals a tlawm hlimhlawk Fritz hian a khingpui Alex de Minaur chu 6-3 6-4 in a hneh a, USA in semi-final luh theih beiseina thar an nei.
1-1 a nih hnuah Doubles match hmangin semi-final lut tur zawk zawn chhunzawm a ni. Asutralia tana inkawp Matthew Ebden leh Jordan Thompson te inkawp chuan USA tana inkawp Shelton leh Tommy Paul te inkawp chu 6-4 6-4 in an hneh a, an trophy kawl mek humhim thei tura hma lam panin, semifinal an lut zui ta a ni.
Semi-final ah champion lai Italy leh Australia te an inhmachhawn ang a. Semi-final lehlamah Netherlands leh Germany an inhmachhawn ve thung ang.
Italy in Davis Cup final an lut
