European Championship qua-lifier match hnih khelh la hmabak Italy chuan June 2022 atanga an koh tak loh AC Milan captain Davide Calabria chu tunthla chhunga North Macedonia leh Ukraine hmachhawn tur squad-ah an kokir.
Luciano Spalletti hian Lazio captain Ciro Immobile erawh a hnawl thung.
Karliamta Zirtawpni khan Italy squad thar hi an puang a, tah hian club lama a chetthat rah sengin kum 29 mi ni tawh Milan defender Calabria chuan ram tana duty tura kohna a dawng leh ta nawlh a ni.
Kaihza tha hliam avanga season kal laia talbuai tawh striker Immobile erawh tunhnaiah Lazio tan rawn chetha chho leh mah se koh zingah a tel pha ta chuang lo a, karliamta Thawhlehni Cham-pions League home game-a Feyenoord an hnehna goal awmchhun khungtu a nihna pawhin Italy boss a hmin zo lo!
Juventus defender Andrea Cambiaso leh Monza midfielder Andrea Colpani chu ram tana koh vawikhatna dawngtute an ni.
Spalletti team Italy hian Group C-a point 10 nei chungin an group-ah pathumna an luah mek a, Ukraine lakah hian point thumin hniam mah se game khatin an khel tlem thung.
Italy hian November ni 17 hian North Macedonia an mikhual dawn a, he team hi an intum hnuhnung vawithuma an hneh zawh miah loh team kha an ni!
November ni 20 khian European Championship qualifier kharna atan Leverkusen khawpuiah Ukraine an hmachhawn dawn a, he inkhel hi nakkum Germany rama tournament khel tur zawnna kal mekah an group atanga pahnihna dinhmun luaha automatic-a tling tur zawnna inkhel pawimawh a ni ang.
Group C-ah hian point 16 khawl tling tawh England chu hmahruait ni mekin, Germany panna ticket an hum tawh nghe nghe.
Italy squad
Goalkeepers: Gianluigi Donnarumma (Paris St Germain), Alex Meret (Napoli), Ivan Provedel (Lazio), Guglielmo Vicario (Tottenham Hotspur)
Defenders: Francesco Acerbi (Inter Milan), Alessandro Bastoni (Inter Milan), Alessandro Buongiorno (Torino), Davide Calabria (AC Milan), Andrea Cambiaso (Juventus), Matteo Darmian (Inter), Giovanni Di Lorenzo (Napoli), Federico Dimarco (Inter), Federico Gatti (Juventus), Rafael Toloi (Atalanta)
Midfielders: Nicolo Barella (Inter), Giacomo Bonaventura (Fiorentina), Andrea Colpani (Monza), Bryan Cristante (AS Roma), Davide Frattesi (Inter), Jorginho (Arsenal), Manuel Locatelli (Juventus)
Forwards: Domenico Berardi (Sassuolo), Federico Chiesa (Juventus), Stephan El Shaarawy (Roma), Moise Kean (Juventus), Matteo Politano (Napoli), Giacomo Raspadori (Napoli), Gianluca Scamacca (Atalanta), Nicolo Zaniolo (Aston Villa).