Jail leh Home-a awm tan
Bana Kaihah ruahman tel
Sawrkarin ruihhlo do leh tih rem a ngaipawimawh takzet a, hemi atan hian ruihhlo avanga jail leh home atanga chhuakten ruihhloa an tluk tawh lohna turin Bana Kaih hnuaiah ngaihpawimawh an tum tih chief minister Lalduhoma chuan a sawi.
Nilaini khan Saitual leh Khawzawla Excise & Narcotics Station chu chief minister hian a hawng a. Home leh jail atanga ruihhlo ngawlvei chhuakte an tluk leh tawh lohnan chhawmdawlna pek an tum tih a sawi a. Home-a awm mekten eizawnna an neih theihnan inzirtir dan an ngaihtuah mek bakah Hand Holding Policy hnuaiah an ni hi ngaihpawimawh an tum tih a sawi a ni.
Ruihhlo do kawnga hnathawk turte lak belh a nih theihnan theihtawp an chhuah tih a sawi a. Khawtlang leh kohhran hruaitute chu ruihhlo do kawngah theihtawpa hma la zel a, Excise & Narcotics department nen thawhhona tha nei turin a chah.
Sawrkar hnathawkte chu sawrkar rawih an nih angin tangkai taka thawk chhuak tur an ni, Lalduhoma hian tiin, Excise & Narcotics department hnuaia thawktute chu ruihhlo laka fihlim tur leh thahnemngai taka thawk turin a chah bawk.
Excise & Narcotics minister Lalnghinglova Hmar pawhin, Saitualah Excise & Narcotics Department-in hmun a nei thei ta chu lawmawm a tih thu a sawi a. Mizoram sawrkarin ruihhlo hluar mek chu a ngaimawh a; Excise & Narcotics department hnuaiah thawktu la tharin, lirthei 18 pek an ni tawh tih a sawi.
Saitual chu ruihhlo tlemna ber district ni turin kohhran leh khawtlang hruaitute leh sawrkar department hotute chu Excise & Narcotics tha taka thawhpui a, tangrual taka hma la turin a sawm a ni.
Excise & Narcotics Station hi district thar pathum- Saitual, Khawzawl leh Hnahthialah hawn a ni dawn a. Thawktu mi paruk theuha bul tan tur niin, Saitual station-ah hian officer -in- charge ah R Lalruatliana dah a ni.
Jail leh Home-a awm tan Bana Kaihah ruahman tel
