Thawhtan zing khan NBA regular season khelh chhunzawm a ni a, LeBron James chetthat zarah Los Angeles Lakers chuan an khingpui Philadelphi 76ers chu point liin an hneh thei hram. 76ers an hneh tum hian Luka Doncic pawhin LA Lakers tan bul a tan ve leh thei ta bawk.
LA Lakers leh Philadelphia 76ers te hi an inhnehtawk viau a, inkhel hmuhnawm tak an lantir. Quarter khatnaah point 30 ve ve thawkchhuakin chungnung zawk an awm thei lo phawt. Quarter hnihnaah 76ers an khel tha chhunzawm a, point 30 an thawkchhuak nawn leh. 76ers in point 30 an thawhchhuah laiin Lakers in point 23 chauh an thawkchhuak ve thung a, point 7 ngawta hnufual zawk chungin chawlhlawk an hmang.
Chawlhlawk hnu lamah LA Lakers an khel tha ve thung a, quarter thumnaah point 34 thawkchhuakin, point 10 in an sang zawk a, point thuma hmahruai chungin quarter hnuhnung ber an hmachhawn. Quarter hnuhnung berah chak tumin an innawr tawn nasa hle a, an inlehthal tawn zak zak. Minute hnih leh second 9 chauh a awm tawh tihin point 105 ve ve an hmu a, an la inhnehtawk. Hemi hnu hian player ropui LeBron James chuan point nga a thawkchhuak zawn a, LA Lakers in hma an hruai. Inkhel hmuhnawm takah hian LA Lakers in point 112-108 in an chak hram a, hnehna hlu tak an chang.
Harsa taka Philadelphia 76ers an hneh tum hian December 30-a kum 41 tling mai tur LeBron James chuan point 29 a thawkchhuak a, ball sawhlet vawi ruk a dawn bakah assist vawi vawi ruk a nei tling bawk. James a chetthat rual hian hliam damkawr Luka Doncic pawh a chetha viau a, game hnih a khelh theih loh hnua a inlan lehna hmasa berah point 31 a thawkchhuak.
Los Ageles Lakers hian Western Conference-ah pahnihna an luah mek a. Philadelphia 76ers hian Eastern Conference-ah pasarihna an luah ve thung.
James-an Lakers an chakpui
