Jammu & Kashmir-a roreltute chuan zirtawpni khan an Union Territory chhungah thal khawro lai leh ruahtui tlak that loh avangin power siam chhuah theihna a tlak hniam nasat thu leh electric eng pek chhuah kawngah harsatna an tawh nasat thu an sawi.
“Khawro vangin luia tui luang te a tlem em em a, hei hian power siam chhuah theihna a ti tlem em em a ni. Kan power siam chhuahna hmun, a bik takin Baglihar atang chuan power kan siam chhuah theih zawng zawng zat chu 1,050 MW a ni a, mahse hei hi September thla tawpah chuan 700 MW vel a ni a, hei hi tunah chuan 200 MW in a tla hniam leh tawh a ni. Hetia a tla hniam duai mai hi thil mak tak a ni a, power supply a nghawng nasa hle a ni” tiin H Rajesh Prasad, Principal Secretary, State Power Development Department (PDD) chuan a sawi a ni.
Jammu & Kashmir hian a vaiin 2,600 MW electricity an mamawh a, hetih lai hian anmahni hian 1,400 MW dekchhuak ve theiin 700 MW chu National Power Exchange atangin an lei ve thung a ni.
Kashmir lama power supply hi 1,200 MW vel niin Jammu lamah hian 900 MW a ni ve thung a ni. “Nikum-a power supply pek kan nih zat chiah ang khan tunah pawh kan la nei thei a. Amaherawhchu, central leh state atanga kan neih theih hi 1,400 MW chiah a ni thung a. Tunah hian power exchange atanga 700 MW te nen a vaiin 2,100 MW power supply dawng ang kan ni a. Hei hi a hautak hle a ni”, tiin PDD Secretary chuan a sawi a ni. Jammu & Kashmir hian power exchange atangin electricity hi unit khat zelah Rs.7 a lei thin a.
“Tunah hian a rate sang berah unit khat Rs.4.50 in electricity supply kan ni a. Hei hi state sum senso atan chuan a sang em em a, thla khat ah Rs.750 crore zel state-in a senso a ngai tihna a ni a, thlasikah phei chuan Rs.850 crore ah a kai chho dawn a ni. Hei hi dinhmun khirh tak niin kan theihtawp chhuaha inenkawl theih hram kan tum a ni”, tiin PDD Secretary Prashad chuan a sawi a ni. Lieutenant Governor Manoj Sinha chuan power supply hnianghnar zawk a awm theih nan kawng hrang hranga theihtawp an chhuah thu a sawi ve bawk.
J&K phai ruamah chuan power cut a awm chho tan reng tawh a hei hi thla a lo sik tual tual anga a nasat tual tual tur thu sawi a ni. Amaherawhchu, electric inen chhawk hi a tlem thei ang ber thlen tir turin kan theihna sang berin hma kan la mek a ni, tiin L-G Sinha chuan a sawi a ni.
India sorkar chuan J&K tan quota dang siam belhin 1,350 MW atanga za zela 56 chu J&K tan a ruahman dawn a, hei hian power supply mamawh san lai bera harsatna chu a su kiang deuh tura ngaih a ni. Srinagar-a Raj Bhawan ah chanchinbu mite hmaah thu sawiin Sinha chuan “Kum 3 kalta khan kan UT tan hian power supply pek chhuah leh a sem zai dan nasa taka tihpun a ni a.
Tunhma nena khaikhinin tunah pawh power supply tam zawk kan pe chhuak thei reng a, mahse hemi avanga kan hloh erawh a tam a ni tih chu a dik” tiin a sawi a ni. J&K a thuneitu te chuan Jammu and Srinagar khawpui-a chhungkaw nuaih 21 vel atanga za zela 50 te chuan meter box hlui an la hmanga chhungkaw nuaih 4 te chuan tunlai meters changkang chi an hmang ve a ni.
Jammu & Kashmir-ah Power Supply buai
