Delhi leh Jharkhand capital Ranchi-ah thil danglam tak thlengin Enforcement Directorate-te chuan Chief Minister Hemant Soren chu pawisa chheprelh chungchangah thu zawhfiah an tum a. Official-te chuan Soren chu darkar 24 a chin hriatlohin a awm tawh an tih laiin a party Jharkhand Mukti Morcha te chuan Chief Minister chu a him a, biak pawh reng a ni an ti thung.
ED te chuan Soren chu khawiah nge a awm an hriat loh thu an sawi thung a. A chartered plane Ranchi atanga Delhi a panna chu Delhi airport-ah a awm a. A phone leh a staff te phone chu switch off vekin a awm bawk.
A BMW car chu Delhi-ah awmin ED ten an man zui tawh a, a driver pawh thu zawhfiah niin awmzia a awm lo thung. Document thenkhat leh Rs 36 lakh erawh man niin sawi a ni a.
ED te chuan Thawhtanni khan Delhi-a Soren chenna in chu an tlawh tawh a, Jharkhand Bhavan pawh tlawhin mahse Soren chu hmu zo lovin Pathianni zanlaiah Delhi a chhuahsan anga ngaih a ni.
Hetihlai hian ED te chuan Soren office atanga lehkhathawn dawngin Nilaini chawhnu dar 1-ah thu zawhfiah turin a inlan ang tih a inziak a ni.
BJP Jharkhand unit chuan Chief Minister chu ‘tlanbo’ tia sawiin Governor CP Radhakrishnan chu hma la turin an ngen a. Governor chuan thil awm dan a enfiah reng tur thu sawiin, “Governor hna a ni a, hma ka la ang” tiin a sawi.
Jharkhand BJP president Babulal Marandi chuan an thu hriat ang chuan Soren chuan Delhi chu zanlaiah ke in a chhuahsan tiin a sawi a.
JMM leh an thawhpui Congress te chuan Chief Minister chu Ranchi ah a lo let leh thuai dawn ti thungin ED chetdan chu ‘politically motivated’ tiin an sawi a. JMM te chuan Soren thlawp nan Jharkhand-ah rally an nei bawk.
“CM in mimal thilah Delhi a pan a, a lo let leh ang. ED te chetdan zawk hi constitution kalh a ni a, politics thila hmalakna a ni” tiin JMM general secretary leh thupuangtu Supriyo Bhattacharya chuan a sawi a.
Jharkhand Congress president Rajesh Thakur pawhin Soren chungchang thil kalpui dan hi ‘fing taka inphiarrukna a ni’ tia sawiin, “State ah President’s rule puan a nih theih nana hmalakna a ni a. CM a bo tiin dawt thu thehdarh a ni” tiin Thakur chuan a sawi.
JMM kaihhruai ruling alliance MLA tin te chu Jharkhand chhuahsan lo tura tih an ni a, JMM general secretary Vinod Kumar Singh chuan MLA te chuan hmalak zel dan tur kan rel ang tiin a sawi.
BJP MP leh Jharkhand leader Nishikant Dubey chuan Soren nupui Kalapna chu Chief Minister atana dah tumna a awm a ti a. “Hemant Soren an a mi leh sa te, JMM, Congress leh an MLA thawhpui te chu Ranchi a awm vek turin a ti a ni. Hemant nupui Kalpana Soren chu Chief Minister a dah tumna a awm a. CM hian ED thu zawhfiah a hlauh avangin Ranchi chu vehicle in a lut ang” tiin a sawi bawk.
Soren hi Jharkhand a mafia tena dan kalha ram neitu nihna an thlak chungchang kaihhnawihah chhui chian mek a ni a, he thil kaihhnawihah hian ED te chuan mi 14 an man tawh a ni.
ED te chuan January 20 khan Soren chu thu zawhfiahna an lo nei tawh a. JMM te chuan Soren chu thu zawhfiah a nih hnu lawkah eng vangin nge thu zawhfiah nawn leh tum a nih an ti a. ED te chu amred personnel-te nena CM chenna an pan avangin an sawisel bawk.
“Chief Minister mai bakah State mipui 3.5 crore te hmuhsitna a ni. ED institution-te ang hi BJP-te hmanrua mai em ni? State sorkar tihtluk nana an hmanrua mai em ni? Delhi an awm laiin Centre-in Chief Minister te lakah eng nge a tih theih?” tiin JMM-te chuan zawhna an siam bawk.
Jharkhand CM Soren man tum, a awmna hre lo
