Indian venhim hna thawktute chuan Thawhtanni khan Jammu & Kashmir-a Srinagar dai, Harwan bula Lidwas vengah mi firfiak pathum an kap hlum a, an zinga pakhat hi April 22-a Pahalgam-a firfiakte chetna thlenga a bultumtu ni ngeia hriat a ni.
Operation Mahadev tia a hming vuaha chet chhuahna hi thu an dawn leh chhuinaa mi firfiak an awm ngei tih an hnua tih a ni.
Beihpui thlaknaah hian Indian Army leh Jammu & Kashmir Police an thawk chhuak.
An thah zinga pakhat hi Suleiman Shah nia hriat niin ani hi Pahalgam-a mi firfiakten mi 26 an thahna ruahmantu zinga mi nia hriat a ni.
Hetih lai hian thah takte hi tute nge an nih chiang taka hriat theih a la ni lo tih Inspector General of Police (Kashmir Zone) Vidhi Kumar Birdi chuan a sawi thung.
24 Rashtriya Rifles leh 4 Para unit-ten heng lai velah hian mi firfiak an awm tih an hriat hnuah chawhma dar 11:00 vel atangin ‘Mahadev’ hi kalpui tan a ni a. Venhim hna thawktute hi darkar thum vel firfiakte nen hian nasa takin an inkap a, an zinga pathum, ralthuam tam tak nena inthuamte hi an kap hlum ta a ni.
Shah-a bakah hian mi dang pakhat hi Jibran-a nia sawi a ni a. Ani hi Lashkar-e-Taiba pawla mi, October, 2023-a Sonamarg Tunnel beihna, mi pasarih thihnaa thlentu zinga tel ve nia hriat a ni.
Inkahna thlenna hmunah hian venhim hna thawktute hian ralthuam eng emaw zat an hai chhuak zui a. Heng zingah hian M4 carbine, AK rifle pahnih leh indonaa hman chi thil dang a tel a, an ralthuam thihsan en hian mi beihna thlen an tum ngei nia a lan thu an sawi.
PTI-in a tar lan dan chuan Pahalgam-a beihna a thlen tuma mi ang bawk technical signal hmuh a ni a. Tun tuma inbeihna hi Dachigam National Park huam chhung niin sipaite chet chhuah hma hian rawm ngaw chhah tak, kawr ruam thuk tak a nih avangin drone hmanga thlithlai hmasak a ni bawk.
Operation Mahadev hi Kashmir Valley-a mi firfiak awmte, a tê ber atanga an hotu lawk ber thlenga tihchimih tumna kal zela kalpui a ni.
J&K-ah firfiak pathum that,Pahalgam beihna bultumtu tel
