Ruihhlo ngaite enkawlna Jordan Centre Sethawn chu Thawhlehni khan Mizoram Synod Moderator Rev. John Raldosanga’n Pathian hnenah hlanin a hawng a. Social Welfare minister Lalrinpuii’n a hmanpui.Synod moderator hian tawngtaiin Jordan Centre hi Pathian hnenah a hlan a. A hlawhtlinna tak tak tur chuan taksa leh thlarau lam a tankawp a ngai, tiin, chumi tihlawhtling tur chuan theihtawp chuah a ni dawn tih a sawi.
He hmun pual hian Synod chuan ngaihtuahna a seng nasa hle tih sawiin, “Mizoram sawrkarin chhanchhuah ngaite chhanchhuak tura Synod min ring zo hi kan lawm hle a. Min rin ang ngeiin Pathian rinchhan chungin hlawhtling taka kalpui turin theihtawp kan chhuah dawn. De-addiction (ngawlvei enkawlna) piah lamah a enkawl zuina tur training buatsaih tum a ni a, chu chu a hlawhtling kan beisei,” a ti. Jordan Centre hlawhtlin theihnan tawngtai leh thilpeka theihtawp chhuah turin kohhran hote a sawm tih a sawi a ni.
Synod-in ruihhlo ngai enkawlna hmun pathum a neih tak thu, Mizoram chhunga Home hrang hrang tanpuina Synod-in cheng nuai 80 a pek chhuah dawn thu pawh a sawi bawk.
Social Welfare minister chuan, he chanvo a chelh tirh, sawrkarin a enkawl lai khan, a theih ang angin enkawltu tur tha leh rintlak a zawng ru tih sawiin, Synod hotute a lo biakkual thu a sawi a; ama mimal ang chuan he hmun hi Synod-in enkawl se a duh ber tih a sawi.
“Sawrkar ringawt chuan hetiang hi tha takin a enkawl thei loa, kohhranin thlarau bote hmangaihna nena a enkawl chi a ni. Synod hian rescue home tha tak tak a lo enkawl tawh thin a, chuvangin hei pawh hi an hlawhtlingpui ngei ka beisei takzet. Kum 15 chhung atan inremna siam ni mah se, a aia rei pawh kalpui zui zel kan beisei a, sawrkar pawhin a thlahthlam dawn lo,” a ti.
India ram pumah mi cheng zat atanga chhutin ruihhlo ti ah Mizoram a sang ber tih Lalrinpuii hian a sawi. “Mizoram hi Kristian kan nihna atanga min tluksawp tir tumin Setana hian min bei a ni. Kohhrante hi ruihhlo beihna tura ralthuam pawimawh ber kan ni a, sawrkar leh tlawmngai pawl hi a thlawptu leh a dawttu an ni,” a ti. Ruihhlo tih rem tuma sawrkarin hma a lak dan a sawi bawk.
8 Jordan Centre hi thuang hnihin kalpui tum a ni a. Ngawlvei enkawlnaah (de-addiction) mi 70-80 awm theiin, a dam mekte training pekna (after care) ah mi 150 vel awm theihna tur ruahman a ni.
8 Addict centre mai ni loin, thil zirna (training centre) a ni tel dawn a ni. A awm man hi thla khatah Rs. 3000 a ni anga, pe thei lote chu Synod-in a tumsak dawn a ni. October 7 atangin admission hawn a ni a, October 20-a luh tur a ni.
8 Jordan Centre enkawl tur hian kumin March 18 khan Mizoram sawrkar leh Mizoram Synod chuan memorandum of agreement ziakin, kum 15 chhung atan Synod enkawl tura hlan a ni a. Director hoin thawktu mi 28 an awm a, September 18 khan thawktute hian an hna an zawm tawh.
8 He hmun enkawl tur hian Jordan Centre Managing Committee siam a ni a, chairman atan executive secretary i/c Synod Social Front Rev Dr K Lallawmzuala ruat niin, director atan Rev Lalrinmawia ruat a ni.
Jordan Centre a takin kal tan dawn Addict Centre bakah Training Centre
