Information, Public Relations, Printing & Stationery minister B Lalchhanzova leh Indian Journalists Union hruaitute chu Ningani khan a office-ah an inkawm a. Thuthar lakkhawm leh thehdarh chungchang sawiin kawng hrang hranga Mizorama journalist-te leh ram chhung journalist-te thawhhona leh inpawhna tha zawk a awm theih dan an sawiho.
IJU hruaitute chu Mizoram an tlawh vanga lawmthu hrilhin, an cham chhungin state hmasawnna hrang hrang chik a, chu’ngte chu an thuziah leh chanchin an thehdarhnaa tarlang turin a chah a. Mizoram leh hmarchhak chanchin leh thil thlengte national news-a hmuh leh chhiar tur a tlem chu a vei thu hrilhin, hengah hian hma lak a tul tih a sawi. Mizoram Journalists’ Association nen kawng hrang hranga journalism chawikanna atana thawhho dan kawng dap a pawimawh tih a sawi bawk.
IJU hruaitute hi, president Geetartha Pathak, vice president Basheer Madela leh office secretary Sunita Devi an ni a. IPRP&S minister hi secretary Betsy Zothanpari Sailo, IPR director K Vanlalsangi ten an tawiawm a, IJU hruaitute hi MJA president C Lalbuatsaiha leh midangten an tawiawm.
Journalists Union-in I&PR minister an kawm
