April thlaa parliament thutkhawm hnuhnung ber hnuah politic inlumlet tam tak a awm a. Hetiang karah hian July 20 atang hian fur thutkhawm tan tura ngaih a ni.
Session lo awm turah hian rorelna inah politic-a tanghote zat a danglam nual dawn niin a lang a. Party danga peng te, tangrual thar te, inzawm thar te an awm a. MP-te thutna pawh a danglam ngei dawn niin a lang.
Kar li chhung awh tur session-ah hian thutkhawm vawi 19 a awm dawn a, August 13 thleng a awh ang.
Trinamool Congress-a inthenna, Uddhav Sena-a inthenna leh DMK-Congress tang dun inthenna chuan house-a tanghote zat a danglam dawn a. Rorel lai lam an pung dawn a, eptu an tlahniam dawn.
Speaker Om Birla chuan session tan hmain TMC MP 20 helten party hriat hlawh lo tak, NCPI an zawm tur chungchangah thutlukna a siam dawn a. Eknath Shinde-a kaihhruai Shiv Sena leh Uddhav Sena MP paruk inzawm pawh a tifel bawk ang.
Tamil Nadu-a Congress leh TVK thawhho hnuah INDIA tangrual leh DMK an inthen a. DMK hian speaker hnenah lehkha thawnin Congress kiangah lo an MP-te thutna thar an dil.
Eptute hian TMC MP 20, Uddhav Sena MP paruk leh DMK MP 22 an hloh dawn a. Rorel lai tangrual, NDA an pung dawn a, parliament-a a term thumna ro an rel mek laiin hmun thuma thena hmun hnih thlawpna an nei thei dawn thuak a ni.
Member 543 awmna Lok Sabha-a hmun thuma thena hmun hnih hi 362 a ni a, bial thum – Basirhat, Shillong leh Nowgong chu MP thihna avangin a ruak a. Hei vang hian hmun thuma thena hmun hnih chu 360 a ni ta a ni.
NDA hian MP 293 thlawpna a nei a. Trinamool MP 20-in thlawp an tum a, Uddhav Sena MP parukin Shinde-a lam an zawm bawk a, hengte nen hian 319 an kai a. DMK MP 22-ten hun bika an thlawpna nen 341 an ni thei dawn a ni.
Tun tum session-ah hian sorkar chuan bill pawimawh eng emaw zat a pharh a rinawm a. Hmeichhte tana seat hauhsakna leh bial siam thatna, 131st Constitution Amendment Bill 131 pawh a tel a rinawm a, session hnuhnung ber khan a tlang zo lo.
Thu dawn danin sorkar chuan he bill-ah hian Lok Sabha leh assembly seat 50%-a tihpunna tur ruahmanna a siam a ni.
130th Constitution Amendment Bill pawh pharh a nih a rinawm a. Bill-ah hian chief minister leh minister-te, prime minister pawh ni 30 chhung a zawna man emaw, judicial custody-a an awm chuan automatic-a paih rawtna a ni.
One Nation One Election Bill sawi hlawh tak pawh chhawp chhuah a ni thei a. Heng bakah hian FCRA Bill, Viksit Bharat Shiksha Adhishthan Bill leh Anti-Doping Bill te pawh siam a nih a rinawm a. Supreme Court judge tihpunna ordinance thlakna tur bill, Code on Wages Central Rules, Corporate Law leh Securities Market Code te pawh siam theih a ni bawk.
Eptute chu tlem zawk mah se thil tam takah sorkar an hual thei a. NEET zawhna put ru chu an sawi duh ber pakhat a nih hmel a. Ram Mandir-a thawhlawm ruk bo te, petrol-diesel man te, thil man sang leh hnathawh tur nei lo tam te chu eptute rilrua awm lian a ni.
July 20 atangin fur thutkhawm, roreltuten thlawptu neih belh
