Fur ruahtui tlak tam lai a nih dawn avangin July atangin Aizawl Municipal Corporation chuan a huam chinah lei laih leh leivung hmanga khuar hnawh lam chi a khap rih dawn a, October thleng a awh ang.
Aizawl Municipal Corporation thuchhuak chuan, Aizawl khawpui chhungah fur laia leimin avangin chhiatna hrang hrang a lo thleng tawh thin a. Chenna in leh lo leh bungrua hlu tak tak channa bakah mihring tawrhna, hliam tuar leh nunna channa hial a lo thleng tawh thin tih a sawi a. Hei vang hian The Aizawl Municipal Corporation (Site Development & Slope Modification) Regulations 2017-a fur ruahtui tam laia hmunhma siamremna tura lei laih leh a kaihhnawih khap tura AMC thuneihna a tarlan angin, kumin July 1 atanga October 31 chhungin Aizawl khawpui, AMC huamchinah lei laih, leivung hmanga khuar hnawh leh a kaihhnawih khap a ni tih a sawi.
He khapna bawhchhia chu Mizoram Municipalities Act 2007 Section 137, 374 leh 386 hmanga hrem theih an ni tih a sawi a. Khapna kenkawh chhung hian chhiatna lian zawk a thlen lohna tura tul bik thilah chuan phalna dil theih a ni. Hetiang tul bik thilah chuan a hmunhma dinhmun chiang taka tarlangin, AMC-ah dilna thehluh tur a ni a, dilna hi a hmuna enfiah tur niin, phalsak ngei ngei an ni dawn tihna a ni lo tih a sawi lawk a ni.
Lei laih khap hian thlan laih, chhiatna thleng avanga leimin senghawi leh thenfai tula chetna, tul bik thila phalna pek erawh a huam lo tih a sawi.
July atangin AMC huamchinah lei laih lam chi khap rih dawn
