“Junior tih hlawh” TBC-a’n an tih loh tur an tih \euh thu a sawi

“Junior tih hlawh” TBC-a’n an tih loh tur an tih teuh thu a sawi
Aizawl West I bialtu TBC Lalvenchhunga, adviser to chief minister-in junior tih a hlawh niin a sawi a, an sorkar chungchang sawiin, an tih loh tur an ti teuh tih a sawi bawk. “Insiamthat ngam loh chuan kan hma hun hi a eng viau lo,” a ti.
June ni 23 khan an party office-a chhung inkhawmah thu a sawi a, “ZPM party-ah hian junior leh senior an awm lo tih hi ka sawi nawn leh duh a,” tih chu sawi hmasakah a neih a, “Kan chief minister kum sawmhnih sawmthum lo zui tawh vanga intitheite tan hmun a awm lo,” a ti.
Party-a a dinhmun a sawi a, PAC-ah a senior ber tih te, inthlan hrang hrangah campaign chairman te, media chairman te a nih tawh thu sawiin, party tana hun rei tak tak chama a zin pawhin party atangin senso tur a dawng ngai lo niin a sawi a, “Vawiinah chuan junior tih kan hlawh ta,” a ti a, eng mah kan thawh ve lo em ni, tiin a zawt.
Party tana sum thawh chungchang te pawh a sawi a, tu nge sum thawh tih pawh a list a la nei vek niin a sawi.
Disciplinary committee leh elected OB te’n insawifiah tura an tih tawh thu leh, PAC member a ni chungin amah ban an lo tum tawh thin tih te a sawi a, chutih laiin party kalha che mi dang chungah eng mah tih a awm si lo nia sawiin, “Vawiin nia party against-a chete sawi apianga hmalak ngam loh bik kan neih te, hei hi kan zah ngawih ngawih a hun tawh a ni,” a ti.
“He ram siamthatna tura kha leh chen kan inpekna, mipui hmaa kan sawi kha dawt a ni lo,” a ti a, chumi an tihhlawhtlin si loh chuan ZPM atangin a bang ang tih a sawi thin thu leh, chu chu a sawi nawn leh ngat duh thu te a sawi.
Thu tha sawi thin te, thu tha ngaithla thin te an awm niin a sawi a, “Sorkar kan han chang a, a chuhhlelh helh kan ni leh ta fur mai bawk a,” a ti a, hna ka la hmu ve lo ti thinte an han chhui chiang a, hna an lo hmu tawh reng si tih te a sawi.
Evangelist tu emawina a hrilh an ngai lo niin a sawi a, “Kan insawi ang kan nih chuan si loh chuan eng nge a hlawkna, sorkara kan tel ve reng hi?” tih te, “Sorkar leh pawh ni ila eng ram mah hi kan thleng dawn lo reng reng,” tih te a sawi bakah, “Kan tih loh tur kan ti teuh tawh. Kan sawi reng reng loh hi hmalak hmasaah kan neih teuh tawh,” tiin a sawi bawk.
An sorkar hnathawh thenkhat pawh a sawi a, agriculture link road atan cheng vaibelchhe tel an seng tawh nia sawiin, “Corruption lianpui a ni hengte hi,” a ti a, thil hrang hranga hnathawhna tura sum an bat hnem tawh thu pawh sawiin, heng te hi thangtharte hmasawnna chhawr tur nge an phurrit tur tia sawiin, FCSAC departmet hnathawh te pawh a sel. Hnathawh a muang tih pawh a sawi a, kum khat chhunga zawh hman tur an thawhah 5% pawh a huna thawh a awm lo tiin a sawi bawk.
ZPM chu duh loh inang, duh inang si lo niin a sawi a, “Congress, MNF duh loh vangin kan kalkhawm a, a kalkhawmate hi kan duh a inang si lo a,” a ti.
An thu leh hla a put darh nasa tih pawh a sawi a, “PAC rorel pawh a leak tho a, Val Upa hnena kan lehkha pawh a leak tho a. Executive group-a ka thu rawn post lah a leak ziah lehnghal a,” a ti a, an party a inlungrual lo nia sawiin, MZP leh MSU te lo be tlawn an awm niin a sawi a, tu tu emaw tanpuina kan zawn chuka party chhung boruak kan sawi chhuah zel te chuan engtin nge ni ang, tiin a sawi.
“Sorkar hnathawk thuhnuaiah kan awm. Kan ngam lo,” tih te, “Hna bak kan zawng lo. Khawtlang hmasawnna kan zawng lo,” tih te, “Sorkar leh pawh ni ila eng ram mah hi kan thleng dawn lo reng reng,” tih te, “Eng mah ti ve thei lo tura sorkara tel ve reng kha eng nge a tangkaina?” tih te a sawi.