Pathianni zan khan Italian Serie A-ah inkhel ngaihven hlawh tak a awm a, Stadio Giuseppe Meazza-a inkhel hmuhnawm tak; goal riat ngawt luhna inkhelah Juventus hi mualneitu Inter Milan an chelh a, 4-4 in an inhnehtawk.
Champion lai Inter Milan hian an mualah bul an tan tha viau a, inkhel tan atanga minute 15-na lekahPiotr Zielinski chuan penalty atangin hmahruaina goal a thun. Hma takah goal chhuah mah se mikhual team Juventus an buai lova, an khingpuite an chhanglet thuai, EPL club te pawhin an ngaihven Dusan Vlahovic chuan minute 20-naah goal thunin an si phurh a sut a. ‘Timothy Weah chuan minute 26-naah hma an hruai letna goal a thun zui leh zat bawk.
Si an phurh hnuin Inter Milan an khel tha zui viau a, goal an thun thuai. Minute 35-naah Henrikh Mkhitaryan chuan goal thunin an si phurh a sut. An si phurh an sut hnu lekah Inter an vannei nawn leh a, penalty an hlawhchhuah nawn leh. An penalty vawi hnihna hi goal hmahruai thuntu Zielinski chuan minute 37-naah a pet goal nawn leh a, 3-1 a hmahruai chungin chawlhlawk an hmang.
Chawlhlawk hnu lamah Inter Milan an khel tha chhunzawm a, minute 53-na lekah Denzel Dumfries chuan an goal lina a thun a, an hmahruaina a tizau. Hun rei tak chhung si hnih an phurh hnuin Juventus tan bench atanga lut Kenan Yildiz chuan goal hnih a thun a, Juventus tlawm tur a chhan him. Yildiz hian minute 71-naah an goal thumna a thum a, minute 82-naah an goal lina thunin, an si phurh a sut zo ta a ni.
Italian Serie A-ah hian khelh 9 atanga point 22 hmuin Napoli in hma an hruai a. Point 18 hmuin Inter Milan chuan pahnihna an luah a, pathumnaa awm Juventus in point 17 an hmu mek bawk.
Juventus in Inter an chelh
