JC.Zoremi Hmar Joute
An dàwr kawta ka kal lai chuan an dâwr chhung chu darthlalang phenah chuan ka’n thlir zawk a, chu darthlang phena kawngpui lam hnaih bera lo ding ka hmuh zet chuan ka lung a phu nghal dup dup a. Mawina duhawm na, itawm leh nalh a nihna chuan min kal peltir thei hlawl lo va, ka ding det a, ka thlir ta ngawih ngawih a.
Keini ang, mawina leh duhawmna ten an màusàm tawh, mit khap kâr leka tar ni mai tawh tur hian ka phû lo tak zet a, ka duh ang ngeiin min lo duh ve dawn ta teh reng pawh ni se kan inhmeh thei hian ka ring lo a ni. Mahse ka awt a, ka it a, ka duhin ka thlahlel ngawih ngawih mai si. Chu thil siam, fai leh thianghlim, han chichunul vel atana awhawm fahran chuan ka thinlung a luah tlat a, thlir tawh pawha thlir ninawm loh an tih ang kha a ni ber e.
Pasal nei lai ka ni a, khawvel danah ka pasal bak duh dang ka neih a rem lo tih hriatna chuan min kiansan lo mah se, mahni hmasialna pawhin min kalsan bik si lo. Uire nih leh phatsantu nih chu ka duh miah lo va, mah se ka thinlung chu a uire chu a ni ta deuh ber lawi si! Miin eng tin nge min ngaih ang tih te ka dâwn lo bik a ni lo va, hnung lama sawi sep kai mai tur ka nih lah ka hai hek lo. Ka chhungte, ka pasal fanaute mai bakah chhungte dang laka mitmei ven a tulzia lah ka infah mawlh mawlh a, chuti chung chuan ka duhna ka lantir hunah min lo hnar bik lo se tih chu ka duhthusam tawp thei lo a ni.
Ni tin mai chuan ka hna thila ka chhuah apiangin an dawr kawtah chuan ka chawl ta fo a, a chang chuan hmu lo ang takin ka awm a, mahse ka hawi sawnsan rei phal ngai lo. Mite chu lungmuang takin an lêng suau suau a, chak tak taka kal leh hmanhmawh miah lo te, ring tak taka titi a, nui hawk hawk ri te chuan min bawh buai lo va, anni ngaihsak nan ka thinlung hian hmun âwl a nei na hek lo. Lungkham nei lote thawven tluk zetin ka duhlai chuan min luah hneh a, aw…ni e, ka zêp lo, ka duh a ni!
Ka pawn lam mawina awngrawp tawh tak hian min tizâm leh thin lo phei se chuan, hma lain ka pan ruak ruak ang a, a laka ka rilru puthmang, ka duhzia leh ka thinlung a luah khahzia te hi ka hrilh ang a, ka ta ni tura ka duh thu pawh ka sawi theihnghilh hauh lovang le. Pawi tur ta bera chu, dâwt sawi ka duh loh vanga pasal nei lai ka nih thu inpuan a ngai tur chu a ni. Min lo pawm duh ang em…nge ni a, na takin min lo hliàm dawn?!
Chhûna nilenga ka vei tawh mah tih nâk alaiin, ka mumang thlengin min chiah hneh ta leh zel a, ka duhna leh ka ta ni ngei tura rilru ka siam pawh a ni telin a zual zel a, in chhungah pawh ka biak tlâk meuh ta lo; keima rilru kawmin ka ngawi reng a, ka pasal pawhin a ngaih a that loh thu a sawi chhuak ta hial mai le. Ka thlakhlelh ber chu an dawr kawta awm a, thlir ngawih ngawih chu a la ni ta fan.
Heti ringawt chuan a tha dawn lo, ka taksa pawhin a tuar mai ang tiin kan pa hnena engkim sawi mai chu thain ka hre ta a. A duh leh min hau ang a, a duh leh mi tenawm tiin kut hial pawh min thlâk fahmiang! Ka duhna leh hmangangaihna theihnghilh tur chuan ka tlâi lutuk tawh; ni e…ka sawi mai ang.
Ka sawi ta! Ka rin loh lutuk maiin kan pa chuan hmuh ve ngei a duh thu te, min hriatthiam thu leh amah chu hmuhpui ve turin min ti ta mauh mai a, ka hrilh a hai angreng viau a, ka lawm bawk si. Hetiang pasal hi an tam ka ring lo.
Inrinni a ni a, kan pa office chawlh lai remchanga làin ka duh em em te dawr pan chuan kan inphur thla ta a. An dawrah chuan lutin ka duh ber mai chu ka pan chat a, kan pa ka han kawhhmuh ve chuan, “Pawisa i neih daih loh chuan ka tumpui ang che,” min ti a, kei chuan ka neih daih thu leh Marroon red chu nalh ka tih ber leh ka duh ber a nih thu chu ka lo sawi vat a, pawisa te pein an hna thawk fel tak takte chuan a tul ang ang min buaipui vat vat a, ka duh leh it em em, ka ta ni mai tura Ray ZR 125 ka’n khalh haw meuh chuan ka scooty hlui zawrh chu thil hrehawm a ni ta lo!
KA BIALPA THAR
