Ka rin leh ka rin: Jabeur vs Vondrousova

Zanin Wimbledon hmeichhe singles final-ah Tunisian sixth seed Ons Jabeur leh unseeded Czech Marketa Vondrousova an intum dawn a, a tu zawk zawk pawh chak se London grass-court grand slam-in champion thar hmel a hmu dawn.
Jabeur leh Vondrousova hi U.S. Open final khela chak lo tawh ve ve an ni a, grand slam champion nih ve chaka tuihal huam huam ve ve an nih avangin All England Club-a dingchang zawk tur huai taka sawi ngam a harsa rih a, chutih laiin Arab nula rothap Jabeur hi nikuma Wimbledon final boruak lo tem tawh a nih avangin a tawnhriat leh champion duhna hian mi rin a kai nattir zawk awm e!
Ons Jabeur hian semi-final pakhat zawkah set khatna hloh zet chunga beiletin Aryna Sabalenka lakah 6-7 (5-7) 6-4 6-3 hnehna a sualchhuak a, kum zawn Wimbledon final khel thei a nihna ngawt pawh hi a pui tawh!
Nikum final-a Elena Rybakina laka lo tlawm tawh a nihn apiahlamah Jabeur hmela tumruhna leh shot mawihnai tak tak a neih hhin vangte pawh a ni ang a, tunhuma a semi-final match-ah hian Centre Court han a hlawh zawk nangiang a, kha last four match kha tunhum tournament kal laia match hmuhnawm leh ropui berte zinga mi a ni ve reng reng bawk.
Inkhelh banah an kawmnaah Jabeur pawhin amah thlawpa a laka rinna nghattute chungah lawmthu a sawi a, he dinhmun thleng tur leh tun tournament atan hian rilru lama amah pui tura a rawih a mental coach nen an thawkrim tih sawi chungin chumi chungchang chu lehkhabua ziah tham a nih thu a sawi.
African leh Arab hmeichhe zinga Slam singles champion hmasaber nih tuma match khat paltlang la hmabak Jabeur hian nikum SW19 final-ah pawh khan lawm leh han a lo hlawh tawh a, Ningani zana world number two a hnehna kawngah pawh amah thlapwna thawm chawl lo kha a chakna hnar pakhat tiin a sawi theih awm e!
Jabeur hian quarter-final lamah nikum final-a a ngam loh Rybakina lakah phuba la fel tawhin, Australian Open champion Sabalenka lakah pawh ropui takin a inlan leh a, nikum aia inrintawkna thuk leh nuam ti zawkin zanin final hi a khelh theih a rinawm.
Semi-final pakhat zawk thlirna
Ningani zan semi-final inkhel hmasa zawkah French Open finalist Vondrousova chuan fanu a hrin ahanga thla kaw hnu leka Wimbledon thiam pali zinga invawrh lehnghal thei Ukrainian Elina Svitolina beiseina a chhahsak a, 6-3 6-3 hnehna awlsam sualchhuak chungin Open era-a unseeded player zinga Wimbledon women’s singles final lut thei hmasaber nihna a chang.
Kha inkhel kha All England Club women’s semi-final match-a unseeded player ve ve intum vawikhatna niin, inkhelh banah hnehna changtu zawk hian a huntawn chu a awih theih loh hial thu sawi chungin final a lut chu a hlim em em tih a sawi a, a tumpui fakin, “Elina kha fighter ropui, mihring mihrinna zawnah pawh mi ropui a ni a, tum a hautak a, chuti chungin ka hlim em em a ni,” a tichhuak.
Kum 24 mi hian hmeichhe unseeded player zinga Venus Rosewater Dish chawi hmasaber nih a tumna kalzelah Australian Open champion Aryna Sabalenka hnehtu Tunisian sixth seed Ons Jabeur a tum leh dawn tih tarlan a ni tawh a, chutiang mi chuan nikum khan thla ruk ngawt a inkhelh loh thu leh chuti chunga a chimchin mak a tih thu a sawi. Vondrousova hian kumin Wimbledon khelh han hma hian grass-ah All England Club inbuatsaihna match li chiah a khel a, chuti chunga final a thleng thei hi pui ve tak chu a ni!
History hnaivai kan thlirletin women’s singles bikah rin loh taka Grand Slam finalist kan hmu nual tawh a, mahse, Vondrousova kalkawng hi chu mak taka 2014 Wimbledon final lut Eugenie Bouchard hnu lama la mak ber a ni awm e.
World number 42-na daih luahtu Von-drousova ngei pawh hian heti tak maia grass court grand slama a thlengsang ta mai hi mak a ti a; clay leilung hi Czech nula thiamna muala ngaih niin, kum 2019 khan tleirawl kum 19 mi lek ni chungin French Open final a lut nawlh tawh a, he lei sen final-ah hian Australian Ashleigh Barty a hneh zo ta lo a nih kha.
Roland Garros final a khelh hnu khan grand slam tournament a khelh tawhah last 16 a pel ngai ta lo a, hum hnih ngawt a banrek zai a nih avangin nikum October thla mai pawh khan inkhel thei loin a la bawksawp a, nikuma thla ruk ngawt a inkhelh theih loh thu leh chutu chunga a chimchin rawn sang chho leh ta mak a tih thu pawh tarlan a ni tawh a, world number three hial lo ni tawh Svitolina hnehna final a lut hian khawvel a barakhaih lo thei lo.