Zobiakvela@Masena
US-ah party pahnih Republican leh Democrats an inlal chhawk thin a. Lalna a inthlâkin kal hmasate thil tih an sawisel thâwm kan hre ngai lem lo a! Kal hmasate thil tih, hnathawh harsatphah nan chhuanlama an hman pawh kan hre ngai hek lo! An Foreign, Economic policy a inang lo a nih pawhin an duhdanin an kuai her mai.
US President a nih lai khan Donald Trump-a’n, engnge a sawi kha, “We must think big an dream even bigger” a ti a nih kha. ‘Thil ropui tak ngaihtuah ila, kan duhthusam ram phei chu, chu aia lian leh ropui chu la ni cheu rawh se,’ a ti mai a ni. Sorkar hmasa thil tih sawisel emaw an tih dik loh zawn lamah a ramtang chiam lo.
Narendra Modi-a’n kum 2014 May thla tawp lama thuneihna a chelh khan engnge a sawi, “India ram hi party dangin kum 60 an lo enkawl ta a, thla 60 (kum 5) kan han enkawl ve ang a, kan danglamna in hmu ang. Mi han fiah tehreng u, a ti a nih kha!
Ram tana tha tur nia a ngaih angin hna a thawk a, a ti tha vek kher lo ang, a hlawhtling vek kher lo bawk a. Tangka note lian tihtawp leh Union Budget-ah pawh ram sum leh pai dinhmun thanna-in beisei a phâk bik mai lo tih kha, a bul tan tir lam chuan a lang reng.
Mahse, Prime Minister Modi chuan, harsatna a tawh pawhin, “Congress sorkar-ah pawh khan… an lo chutih vang a lawm le…” a tih a tih kan hre lo. “Kan hnathawh rah in hmu zel ang,” a ti mar reng zawk a! Sorkar hmasa thil tih khûm tumin a bei zel zawk a ni. Kal hmasate thil tih a chhia a thaah khan mawh-puh tur an zawng chiam ngai lo.
Delhi Chief Minister, Arvind Kejriwal-a pawh Chief Minister a nih tirh atangin tun thlengin a hnathawh kawngah, kal hmasa te’n tihna châng an hriat loh a ti hmiah hmiah mai a. Kawlphetha leh Tui, chhiah chi hrang hrang âwl tir (exempt)-na kawnga a hma laknaah Sorkar hmasa Sheila Dikshit sorkar hming kha a lam ri ngai lo. Beihna emaw vawm let, harsatna a tawh apiangin “Anni hunah pawh khan….” a tih kan hre ngai hek lo
Keini chu, HSLC/HSSLC result a lo chhuak a, kan faten, “Ka fail, mahse, Roliana leh Ngûri pawh an fail ve tho,” an tih hian, nu leh pate kan thâwk huai phah lem em ni? A chhe zâwk zêl kan entawn emaw, chumiah chuan inhnemna tur zawnga chhuanlam siam nana inngahna tlak loh kan inkawhhmuh hian; engnge hlâwkna awm? Kan Zoram dinhmun chu lungchhe tak chunga ngaihtuah nawn ngai a nihzia mai lo chu engnge hriat belh tur awm chuang ang le?
Sorkar hnathawk te’n thla thar ni 10 hmain hlawh an la a, hahîpin kan infak a. Tai nei rân kher kherin kan infak a! Finance changtu Minister chu sorkar hnathawkte hlawh buaipuitu a ni sa a, a tih tur a tih vangin fak chiam a tulna a awm lo. Kan Pastor-in mithi a vui a, a chângin tuak tharte a inkutsuih tir a, a chungah kan lawm hle, kan ti ngai chuang em ni? Kan tih tur ni sa, kan kuta tla, infak ngai hranpa chuang si lo hi a awm.
Samagra hnuaia thawk te’n hlawh an lak theih loh chuan a ngaihtuah sak theitu chu School Education Minister a ni mai. Hlawh an lak theih tak avanga ‘kan Minister chak tak hmalakna-in…’ tih duah te hi, thu awmze nei lo, thlaler au-aw mai mai a ni.
Health Care Bill emaw Contractor Bill a ni emaw, Electric Bill, Tui Bill pek lohin a awm a nih chuan, a pe theitu chuan pek dan a zawng ang a, a pe mai tur a ni. A ti theitu chu mi tam an awm hleinem, an kuta awm, an duha an tih leh tih loha innghat mai a nih laia, chintâwk nei loa lawmthu inhrilh kan chîng hi sim then a hun tawh. An hmalakna zarah tih duah zel mai hi a chuangtlai a, anmahni ni lo, thuneitu dang an awm chuang hleinem.
Aw le, Mizoram hian hruaitu tha a mamawh kan ti thin a, kan la mamawh chho dawn hlein a lang. Mahni thusawia ding nghet, hruaitu huaisen kan mamawh a, sawi loh anga awm zel ang chi hi chu kan intodelh mah mah.
Mipui lam hi chu kan tha sa tia sawi ngam a ni a, tuna tha tawk lote pawh, thuneihna, fuihna tha leh kaihhruaina dik hmanga hruai harsa lo ber hnam kan ni ang.
Kan sualna hi a la thûk vak lo. Kan inthlahdah zel erawh chuan, kir leh theih lohna hmun kan thleng ang a, kan inchhirin bán a cheng ang a, a sâwt tawh si lo ang tih a hlauhawm. Kan hotute hian min hruai dik tum se la, ram tan thlan tui an sên tam zawh poh leh, kan raltiang ram thlir chu kan hnaih sauh sauh ang a. Kal hmasate dem khawmuang mai mai hman kan ni ta lo ve.