F.Lalremsiama, Chaltlang
Ni e, an tan tha viau reng bawk alawm le, MLA tinin car thar a thlawna an dawn thin an ti tawp ngawt mai phal pawh hi that entirna chhuanawm a ni.
Ni (100) chhunga tihtur Chief Minister-in December thla tira a sawi kha erawh a tam zo zai a, ka huphurhpui ru deuh a. Hlauhthawn ruk ang ta deuh chuan ka hria.
|hian pakhat tawngkam khat, “Fate hmangaih leh ram hmangaih hi a sim theih loh”. A enga-khaw ti ve thei hlei lo si hi ka hah ru ve reng mai. Prime Minister Indira Gandhi Emergency laia ‘thawk tam zawk la, tawng tlem zawk rawh’ tih ang deuh khan sawi tam ai chuan thawh tam zawk a tha.
Chutichuan, election a zo tawh a, ZPM sorkar a ding tawh a, thlan tlin hruaitute ho hi an tawng tam mah mah em aw tia Zoram thlirtu thian pakhat chuan min tih khum. Hman deuh tawha thian pakhatin Minister of ceremonies hi awm law law se a tih fiamthu titak te kha tun lai thil awmzia hian min hriat chhuahtir thar. A lar khel zia deuh em, nge beng sika office leh in lam pawha inngaihtuah hah ai chuan a nuam lama han hawi harh chak vang nge, central sawrkar laipui hotute tih hmuh awlsam luat vang aw?
Pu Duhoma ber pawh hian puitu fing, tha leh huaisen a va mamawh teh lul em. Tun term chauh pawh a la sei a, term leh pawh ama ho sawrkar tluan se ka duhsak vei nen, lungphum tih vel vel, hawn tih vel vei chu a la awm tam deuh deuh dawn alawm. Lo nghet mup teh rih se- a pu min Pu CH CHHUNGA ang mai khan!
Politik hi a lo mak lulai em mai a. Hman leh Tun hi a danglam chak hle naa Dan ang zela Rorelna kalpui (rule of law) a nih chuan zamna tur a awm lo. Lang tlang (transparency) duh luat vanga Minister hova bawr luai luai hi a tha ber lo. Secondhand Kudam-a vanduaina runthlak thleng te, Matric zawhna lo hriat ruk thua zirtirtu jail-a um luh hial tak te kha- engtin nge ni ta zel tih lam zawk te hi he sorkar thar kan nghah hlelh em em ‘vei leh tih fel tur’ chu a ni dawn lo’m ni? A nih dan (level) te tea hna chanpual nei te tih zel (vil hnai ran chung siin) hi kan thawhhopui Pawl pakhat thupui te pawh a nih kha.
A sei ninawm dawn, dam tein sawi tur tam zawk chu chhunzawm atan i dah rih ang.