Kalphung thar sawrkar hnuaiah ram a dingchhuak ve ngei dawn – Lalliansawta

Kalphung thar sawrkar hnuaiah
ram a dingchhuak ve ngei dawn
– Lalliansawta
Kalphung thar mipui sawrkar kal dan thlirin, kan ram chu a la ding chhuak ve ngei dawn nia a lan tak thu ZPM president Lalliansawta chuan a sawi.
Kum 2025 atan ZPM party chuan Thawhtanni khan an office an hawng a. ZPM president Lalliansawta chuan kalphung thar mipui sawrkar chuan a dinchhan ang ngeiin Mizoramah hmasawnna thar a thlentir mek niin a sawi.
Tunhma atangin Mizote eizawnna ber chu thlawh hma neih a ni a, mautamin tam nasa tak rawn thlenin, ei leh barah harsatna kan tawk a. Kum 1966-ah rambuaiin min nang leh a, hnathawk thei thalai leh pa hoin ramhnuai leh jail-ah hun an hman a ngai a, kan economy a tlakhniam phah duai duai tih Lalliansawta hian a sawi. Mautam tam a dam chho dawn chauh tihah a aia rapthlakin Zofate min nuai a; hun a lo inher a, UT ah kan ram hlankai a ni a, phuihnam chawr leh bahra laih tur inchuh thin khan India sawrkar atanga sum lokal kan inchuh leh ta tih a sawi bawk.
“Kan ram tana project tha leh rotling tur ngaihtuahna kan nei pha meuh loa, mahni pumpuarna leh tanghmahai duhnain rilru a luah hneh hle. State kan nih hnuah pawh chu rilru chu kan la paih hleithei loa, chutianga hun rei tak kan hman hnuah, kalphung thar mipui sawrkar a lo ding chho ta a, he party-ah hian mipuiin beiseina thar neiin an rilru tih harhin a awm mek a ni,” a ti.
Vawiin thlenga kalphung thar mipui sawrkar kal dan thlir hian, kan ram chu a la dingchhuak ve ngei dawn nia a lan tak thu leh, hmasawnna chhenfakawm sawi tur kan hnutchhiah chhoh mek thu ZPM hruaitu hian a sawi. “Thawklehkhatah kan duh leh beisei ang zawng zawng thleng vek thei lo mah se, Pathianin min hruai anga, kan tum ram kan la thleng ngei dawn. Kan ram tana thawktu zawng zawngten thahnem ngai taka in thiamna leh finna hmang zel turin ka sawm che u a. Kalphung thar rilru pu chungin, hlemhletna leh mahni tanghmahai hnawlin, kalphung thar hian hmasawnna thar ram tan rawn thlen zel se, kan tu leh fa, thangthar tan ram siam hna thawk ang u,” a ti.
LC/VC inthlan kan hmachhawn turah kalphung thar sawrkar hmalakna tluang taka a kal theihnan leh hmasawnna chak zawka a kal zung zung theihnan khawtin leh vengtina Zoram mipuiin ZPM party thlawp turin a ngen tih ZPM president hian a sawi a ni.