Rev Dr Ramengliana
Hmanni UPSC Result chhuah hnu lawk khan Chartered Accountant (CA) Chirag Chauhan chuan, “Eng vang nge maw ni mi hian IAS nih hi an thlan tlat thin ni? IAS ten rei fe an thawh tawh hnua an hlawhte hi CA te hlawh bulthut chauh a ni sia,” tiin. Internet-ah an sawi ho nasa hle a ni awm e. CA ho hi an hlawh hnem a, thla khata cheng nuai 5 hlawh hi a har vak lo a ni mai thei. IAS ho hi an trainning tirh phei chuan Rs 56,000/- vel chauhvin an tan a ni awm a. An hlawha bei tel zawng zawng erawh chu kan va hre ve lem lo va. Tichuan, Chirag Chauhan hian a rawn post danin IAS te thlen san theih ber ‘Cabinet Secretary’ an nihin Rs. 250,000/- an hlawh a, chu chu CA tan chuan thawh tirha an lak ang vel ni maiin a sawi; hlawh hrim hrim chhut chuan a thil sawi hi awm ve angreng tak a ni. Tlem zawk zawk erawh a ni lem lo ve ve tih erawh chu a hriat mai
1. Hlawh tam ringawt chu an lo um bik lo
Heti taka a a rawn sawi hnu hian miin an bei let nasa hle. Hlawh tam ringawt avanga IAS nih hlu ta a nih loh dan te; hna zahawm a nih dan te; midang tana malsawmna nihna kawng tha a nih dan te; thiltihtheihna a ken tel hlutzia te leh thu hrang hrangin an troll rawn a. Post-tu tan pawh nuam lo rum rum awm a ni. Eng pawh ni se, IAS te chu India ram competition sang ber hna a ni a. CA pawh zir chhuah awlai lo, lehkhathiam thei fal te tih mi a ni hrim hrim a. Kan thangthar te han tui chho zel phawt mai sela a tha dawn a ni mai a.
Amaherawhchu, he thu lo viral ta chiam hian kan rilru sukthlek min chhut nawn tir sela tihna tak ka nei a. Ram hnuaihnung tak leh khawsak dan san em em lem lohna hmuna kan awm avang hian rual kan awt tlang a. Chu chuan eibar zawnnaa hlawh tam thei ang ber zawnna kawngah min hruai nasa lo thei lo a. Hna tha leh thawh tlak nia kan hriat chu hlawh tha tha kha a ni deuh mai a. A dik dan pawh a awm tho laiin thil nih dan chu a ni ber bik lo a ni. Mahni tuina leh midangte tana kan par chhuah theihna thil te kan hmuh thiam a ngai ang. Tin, private company hna a ni emaw, sorkar hna a ni emaw, mahni sumdawnna a ni emaw Pathian rawngbawl tura kan hmanrua a nihna a nihzia pawh thar ila ram leh hnam siam thatu a ni ngei ang le.
2. Lehkha kan zirtir chhan kha a lo dik chiah lo a nia
Zirtirtu pakhat chuan a zirlaite hnenah, “Lehkha kan zir chhan chu hlawh tam deuh hlawh a, nupui hmeltha deuh neih a nia…” a ti a ni awm e. Amahah chuan dik viau mah se, hetiang atana lehkha zirte hi ram leh hnam leh Pathian Ram hmelma an ni, a tih theih hial em aw ka ti. Mahse, kan nihna pai theuh a phawk chhuak tha angreng viau si. Khi tiang chhan bak pel thei lo leh pel thiam lo pawh kan tam fu mai thei a. Hlawh tam thei ang ber thawh aia hlu zawk mah chu mahni nuam tih zawng leh midang tana par chhuah theihna hna thawh hi a ni zawk awm asin.
A nih eng vanga lehkha zir chiam chiam thin nge kan nih a, lehkha thiam thiam ten hna an hmuh theih bik riau thin? An hna thawh atana an thiamna a tangkai dawn vang a ni. Hmun tam zawkah chuan sorkar hna tha tak an hmuhin an tum ram thleng ta ang hrimin kan lawmpui thin. Hna hmutu tan pawh hahdamna chi khat chu a thlen ngei ang. Hna tha, hlawh tam tak hlawh theihna hna, hmuh hi kan zir chhan nia ngaih mai a awl viau. Mahse, lehkha an zir leh thiamna zawng zawng kha an hlawh a tam theih nan ni lovin HNA PAWIMAWH TAK KHA THA TAKA AN THAWH THEIH NAN a ni zawk. Hna hmuhah khan a la tawp lova, hna thawh danah teh tur a ni. Tin, hlawh a lo tha viau a nih pawhin a hna a hlut leh pawimawh em vang te pawh a ni ngei ang.
3. Hlawh tam piah lam ngaihven a tul tawh
Kan lehkha zir laia rual u zawkten fiamthua pa leh pa inhmuhsitna tawpkhawk an sawi chu, “I start where you stop,” tih a ni. A awmzia chu “I hlawh pun tawpna kha ka hlawh bul intanna chauh a ni,” an tihna a ni a. Thil awm thei a ni. Hlawh tam leh tam loh ringawta mihring hlutna kan chhut dawn phei chuan inhmuhsitna lian tak a ni tih a chiang. Abraham Lincoln thung kha chu miin “Khatiang i buaipui chuan sum i thawk chhuak tam ngai lovang,” an ti a. Ani thung chuan, “Sum thawh chhuah hnem ka lo tum ber lem hleinem. Ka thawh chhuah ang ang thiam taka hman ka zir zawk alawm,” a lo ti then mai a ni awm e. Zirlaite pawh hian lehkha zir nasat a, hlawh tam tak neih ringawt thlak hlelhtir aiin, an puitlin huna thiam tak leh hlawk taka an hna apiang an thawh theihna turin lehkha zir ta sela, hlawhtlinna chhenfakawm zawk an chang ngei ang.
Hei hi Kristian zirtirna hlei hlei hian a sut fuh a ngai a. Kan thlarau nun hian kan ni tin hna hi a huam tel a ngai a. Kan thawh loh theih loh kan eizawnna hna te, kan hun tam ber kan hmanna hmun kan hnathawhna hmun te chu thlarauvin a bual vek a tulzia chu a lang chiang mai awm e. Thlan tui far zawih zawiha hna thawhte chu Eden anchhia pawh lo ni se, Krista Isuan kan engkim min tlan sak tawh avangin hah thikula kan thawh thin kan eizawnna hnate chu Pathian ropuina lan chhuahna hmanraw pawimawh a lo ni ta daih mai a ni. Chuvangin Kristian chuan a eizawnna hna chu hlawh a tam avangin a thawk ngawt lo va, a hlawh tam tam a ngaisang ringawt bawk lo. A hna chu eng pawh ni se Pathian ropuina par chhuahtirna hmanrua leh midangte tanpuina hmanrua atan a hmang ta hlauh mai a ni. Chu chu Pathianin ringtu hringnun a chher dan a nih daih chu!
Tlangkawmna
|hangthar Civil Service tling zo kan awm tawh lo ve! tiin mangan thu kan chhak chhuak thin. A manganthlak bawk a ni. Kan ram leh hnam hmakhua kan ngaihven a tul si a. Mahse, hlawh tam leh awm nawm hi kan tehfung a nih tlat si chuan central service lam chu kan nei tam har deuh mai thei thung. Pathian malsawmnain a vur nasat tak Mizoramah hian IAS ni kher lova nawm dan leh hlawh tam tak tak neih dan hi a tam em mai! A awlsam zawk MCS te nen danglam tehchiamin kan hre lo. Sum dawng ila IAS aiin kan hausa thei daih zawk (Kan tihfuh chuan)! Mahse maw…IAS tling thei khawpa Pathianin theihna a dah thangthar chuan IAS kal tlangin midangte tana malsawmna nih kawng a va inhawng zau tehreng em aw! Kan ram leh hnam, kan sakhua hian chutiang mi chu a va han mamawh nasa em! IAS chauh ni lo, hna zawng zawng mai hi, a hlawh tam lama chhut kher lova a hna pawimawhna leh thawh thiam leh thawh that a tulzia intuh thar a, chumi atana inzir uluk kan va mamawh em aw!