Kan MP te hi

‘Kan MP te hi’ kan tih hian, India rama MP zawng zawng ni lovin, Mizoram bialtu MP pahnih (Lok Sabha leh Rajya Sabha) te sawina a ni.
Tun hnai khan Rajya Sabha MP K Laltluangkima chuan ZPM party office-a inkhawmah thu sawiin, Foreign Contribution (Regulation) Act chungchang chu Prime minister Indira Gandhi hun lai atang tawha ruahmanna awm a nih thu leh Congress lam an bang bik lo tih thu a sawi a. Hei bakah hian, ZPM sawrkar fakna hrang hrang a sawi a. Mizoram MP a nih anga Mizoram tana hma lak a tum dan pawh a sawi ve tho bawk.
Kan MP pahnihte hi party pakhat ZPM candidate ve ve an ni a, ZPM party fakna leh thlavang hauhna te hi an sawi ve thiang lo tihna a ni kher lo a, anmahni candidate-tu party ber chu party dinhmun sawhnghehna tur an zawnpui ve bawk ang a, a thiang vek ang. A bikin Rajya Sabha MP phei chu rorel lai party aiawh deuh a nih avangin a tan phei chuan neutrality vawn a har lehzual maithei; Lok Sabha MP erawh chu mipuiin direct-a an thlan a nih avangin mahni awmna party colour tih lan lutuk a mawi lo thei.
A khaikhawm nan chuan, Mizoram hi an bial a ni a, an bial chhungah party a ni emaw, mipui a ni emaw, district a ni emaw, thlei bik nei lova an thuneihna leh theihnate hmang tura ngaih leh beisei an ni a. Mizoram an lo chuan chhuah chang pawha party politics rawn buaipui ve vak lova, an bial Mizoram tana hmalakna te rawn sawi thei tura beiseina hi mipui atang chuan a lian ber awm e.
Mizoram hian MP pali te nei ve tawh ni ila chuan, MP te chuan an bial bik vil leh enkawl kha an tihtur a nih avangin, Mizoram chhungah rau rau pawh MP hnathawh a inthlau viau thei awm e. Tunah rih chuan, Mizoram pumpui bialtu MP an ni a, a dan a dang deuh a ni. MP Fund kum khata cheng Vaibelchhe 5 hi party thliar lova an bial Mizoram chhung hmasawnna atana hman tur a ni a. MP Fund piah lamah, Mizoram tana tih theih tam tak an nei bawk. Mizoram mamawh – inkalpawhna, hriselna, zirna etc. atana Central sorkar dawr chu an mawhphurhna leh an dinhmunin a ken tel a ni.
A nihna takah chuan, MP hna pui ber chu Delhi tlang lamah a awm a, chu chu Parliament-a dan siam, Central Budget leh Policy-ah Mizoram aiawha sawi, Central Scheme hrang hrang kan state-a a lo thlen theih nana hmalak, te a ni.
MP te hi chu state-ah ni lo, Delhi tlang lamah han dak thei hle phawt mai se, chu chu mipuiin MP te kan beisei thin dan ber pawh a ni deuhin a lang?