Kan policy a hlawhtling chho zel
– ZPM
MLA inthlanpui neih dawna kuthnathawktute tana an aupui leh intiamna chu a hlawhtling chho zel tih ZPM party chuan an sawi.
ZPM Gen. Hqrs. thuchhuak chuan, kalphung thar mipui sawrkar flagship programme – Bana Kaih Scheme leh ZPM policy tihhlawhtlinna atan district hrang hranga Secondary Collection Centre atangin kuthnathawktute thlai thar, sawhthing kg.ah Rs.50 in a lei tan a ni chu lawmawm a tih thu a sawi a. Kum khat vel chauh ZPM-in sawrkarna a chan hnu a, suangtuahna a tak ram a chang chho ta mai chu Pathian leh Pu Lalduhoma kaihhruai ZPM ministry fawng chelhtute chungah an lawm tih a sawi a ni.
ZPM party-in 2023 MLA inthlanpui campaign-ah Bana Kaih Policy a lo tlangaupui a, mi thenkhat chuan an tihhlawhtlin theih beisei pui lo hle mah se, kalphung thar mipui sawrkar chu kuthnathawktute hmangaihtu leh khaichhuah tumtu a nih avangin Pathian zarah an policy a lo hlawhtling chho ta zel tih ZPM hian sawiin, ‘Kuthnathawktute hlim hmel hian thinlung a hneh hle. Hetihlai hian mipui zingah party hrang hrang kan awm avangin eptu party lam chuan sawrkar ruahmanna sawiselna tur kawng hrang hrang an dap mek a, heng inchirhthehna avang hian kalphung thar mipui sawrkar hi a zam mai dawn loa, kuthnathawktute tan ke a pen zel dawn a ni,’ a ti.
Mizoram sawrkar chuan Secondary Collection Centre hmun 62-a ruahman atangin sawhthing hralh thawhkhatna kalpui a ni tih sawiin, a tahtawlin sawhthing lei chhunzawm zel a ni dawn tih a sawi. Ruahmanna fel tak leh awmze nei taka kalpui a ngaih avangin mipui pawhin sawrkar ruahmanna ngaichang zel turin an ngen tih a sawi bawk.
‘A vawikhatna a ni a, ruahmanna famkim tawk lo a lo awm a nih pawhin sawrkarin ngaihtuahna a seng chho zel dawn. Pu PC Vanlalruata kaihhruai Mizoram Agriculture Marketing Board hruaituten chhum lo chat loin ngaihtuahna an seng a, Bana Kaih Scheme hi ZPM Gen. Hqrs chuan kan ram damna tur a nih kan beisei tlat a, a buaipuitute Pathianin finna leh remhriatna a pe zel ang tih kan ring a ni,’ thuchhuah chuan a ti.
Kan policy a hlawhtling chho zel – ZPM
