Kan tawngkam hmanin remna a hring thin tih Home minister K Sapdanga chuan a sawi.
Young Men’s Christian Association (YMCA) Aizawl chuan August 6 khan Aizawlah World Peace Day an hmang a. Hmanpuitu Home minister chuan, Mizo upa-in ‘Tawngkam thain Sial a man,’ an tih chu World Peace Day lungphum pawimawh takah a tel ang tih sawiin, “Kan tawngkam hmanin remna a hring thin. World Peace Day hi hunbiin a her chhuahah ngai lo ila, a huhoa kan mawhphurhna, keimahni ngeiin kan thawhchhuah tur a nih hriat chhuah thar lehna atan hmang ang u,” a ti.
Remna chu amaha lo piang a ni loa, a thawha thawh chhuah chi, a lo awm hnuah pawh, mar pata duat taka vawnhim chi, vawiin amiten naktuk amite hnena hlanchhawn zel tur a ni tih a sawi a. Keimahni atang lo intan, tihpalh thila neih ni lo, a tuaka tuak chhuah chi a ni tih a sawi a ni.
Tunlai khawvelah hisap aia chakin thiamna leh hriatna leh hmanraw changkangin min chim a, hmasawnna in min nawr loa, min tlansan dawr dawr zawk tih K Sapdanga hian a sawi a. Sualna kalphung technology sang ta lutuk hmet mit tur chuan, sual dona atan pawh kan technology tihpun ve zel a ngai tih a sawi.
“Dai theutu ai chuan lei dawhtu a ropui zawk e, tih a ni a. Khaptu ai chuan kawhhmuhtu nih hi damna kawng dikah ngaih a ni. Chu khawvelah chuan YMCA hian chanvo pawimawh tak kan hmachhawn a, hmahruaitu nih hi kan mawhphurhna a ni. Danglamna siam i tum a nih chuan, nangmah intidanglam hmasa phawt rawh, tih a ni a. Kan hma amiten YMCA hi hlawhtling takin an lo kaihruai thin a ni maithei, nimina hlawhtling taka an lo kaihhruai dan kha vawiinah hian hman chhunzawm a remchang tawh kher loang. Kan mi kaihhruai turte chenna khawvel kha a inthlak daih tawh chuan, hlawhtling taka kaihruai turin kan inherrem ve a tul thin,” a ti.
‘Management’ chu subject harsa ber pawl, pumpelh theih si loh a ni, tiin, inpekna leh taimakna tangkawpa neih chi nia a hriat thu minister hian a sawi a. Hrilhhriat chawp changkanna chu leadership quality a tling lo a, mahnia zir chhuah a ngai zel tih a sawi bawk.
RIPANS hmuna YMCA Aizawl hun hmanah hian RIPANS director Dr Sanjay D Sawant leh YMCA- NER regional secretary Shamir J Thabah chu khualzahawm an ni.
Kan tawngkam hmanin remna a hring thin – Home minister
