Assembly budget session kal mekah nimin khan Leader of Opposition Lalchhandama Ralte chuan kum hnih leh a chanve tling lo deuh sawrkarna chelh mek ten kawngpui siam chungchangah, ‘sawrkar hmasa khan eng nge maw an lo tih le’ tia an sawi thin chu chhang letin, sawrkar hmasa (Congress leh MNF) te pawhin kawngpui an lo siam thin thu sawiin, “Hetiang zawng hian i ti lo ang u, thil tha hi i intihsiak zawk ila, in tih that pawh kan hria alawm; .. kan uang hma mah mah lo maw le?” tiin a sawi a. LoP hian sawrkar mek chu ‘uang hma’ deuha a hriat thu a sawi a ni ber.
Tun sawrkar thar hian, sawrkarna an chelh phat atangin puanven an sawi chhing a, keartui zawn sawh khuarin tan an la nghal a. Sawrkar kal tawhte tih theih loh ti theitu nih tumin thahnem pawh an ngai narawh e. Ni za chhunga thawh tur an han duang nghal rup mai a, hna pawh an thawk chak. Aikal lak titawp tura hmalakna te, kuhva ro sumdawnna titawp tura tanlakna te, ruihhlo do; thlai thar lei, etc., sawi tur a tam awm e.
Hetih lai hian, kawngpui chungchangah an vanduai a, sawrkar kal tawhte hun laia kawngpui chhiat chhan chhuanlam pakhat, ‘fur ruahtui’ chuan a nangching ve ta a. Aizawl leh Vairengte inkar, Mizoram chak lakna kawngpui pawimawh ber, a chhiat dan leh harsatna a thlen tak dan, ram hruaituten an riah chilh dan te, chipchiara sawi a tul tawh awm lo ve.
Kum hnih leh a chanve tling lo an sawrkar chhung hian hmasawnna thar engemawzat hmuh tur a awm, hei hi a lawmawm hle a. Tun session kal mekah pawh hian, opposition lam pawh hian sawrkar thar thil tih that hi an hriatpui a, lawmthu pawh an sawi hnem ve malh malh ta hle. Chutih laiin, opposition role an play-na lamah, thil dik lo leh felhlel nia an hriatte te an sawi chhuah a ngai thin a, a dik zawk hai chhuah tuma thu inchuha han inhnial bap bap chang te pawh a awm. |hahnemngaih luata kutzungtang han tihpir khawng deuh chang pawh a awm thin. Mahse, mi pangngai chunglam an ni a, mipui aiawha roreltu an nihna vawng rengin, rorelna in sânga hnamdangte inbakkaih ang kha thleng em lovin an inhmuchhuak ve leh mai thin niin a lang.
Tuna LoP-in ‘uang hma’ tih tawngkam a han ruai pawh hi, ruling lam hian inenfiah nan hmang se, Mizo pa takin, hriat nuam deuh zawkin tawngkam thlah thei thin se a duhawm hle reng a ni. Term khat hmang zo turinh kum thum deuhthaw an la nei a, an term tawp dawn lamah te chuan, Mizoram tana an thawh that/tih thatah ‘uang’ lova ‘chhuang’ zawk turin inbuatsaih sauh sauh zawk teh se.
Hetih rual hian, House chhung boruak chungchangah, tun hnaia Speaker-in kalphung thar a duan chuan zawm a hlawh tha viau mai a, mipui tan pawh session en a hahdam leh deuh ta. Larsap-in parliamentary decorum sang ber tia a sawi kha, ‘hniam ber’ kan ni leh mai ang tih mipui lam chuan an lo hlauthawng hman hle a ni awm e.
Kan uang hma…?
