MFA I-Day football tournament 2026 chu August 10, Thawhtanni khan khelh chhunzawm a ni a, Kanan FC leh MLS ten quarter-final-a an khingpui hnehin semi-final an lut. Quarter-final hi vawiinah khelh zawh a ni ang.
I-Day football tournament 2026 quarter-final hmasa berah Kanan FC leh Dinthar FC te an intum a, an inhnehtawk hle. Hun pangngaiah goal khat ve ve thuna an inhnehtawk hnuin penalty shoot-out ah Kanan in 4-3 in hnehna an chang.
Dinthar FCin Kanan FC lakah bul an tan tha viau a, inkhel tan atanga minute 10-na lekah Silvana R Lalruatkima goal thun hmangin hma an hruai nghal. He goal hmang hian hun rei tak chhung hma an hruai. Hma an hruai reng hnuin an vanduai a, Lalramhluna chuan minute 67-naah an lamah ti-goal palhin Kanan FC si phurh a sutsak.
Goal khat ve ve an thun hnuin inkhel a hmuhnawm zui viau a, chak tumin an innawr tawn nasa hle. Inkhel hmuhnawm takah goal dang a luh belh thei tawh lova, tie-break hmanga thelh an ngai. Tie-break-ah Kanan FC vannei zawkah an tang a, 4-3 a hnehna changin semi-final an inhlangkai.
Dinthar FC lakah hnehna changa semi-final an luh theih nana thawhhlawk tak Freddy Lallawmawma chu ‘player of the match’ ah thlan a ni.
Thawhtanni-a quarter-final hnuhnung zawkah Mizoram Police FC leh MLS FC an intum ve thung a, inkhel hmuhnawm takah 3-1 a hnehna changin MLS FC in semi-final an lut.
MLS FC hian MPFC lakah bul an tan tha viau a, K Hmangaihkima chuan minute 19-na lekah hmahruaina goal a thun nghal. Mizoram Police lamin an si phurh sut tumin tan an khawh a, ball chang tam bawk mah se hun tha an siamchhuak hleithei lo. MLS lamah pawhin chawlhlawk dawn hnaihah goal thun theihna hun tha tak nei bawk mah se an chhawr tangkai zo bik lova, 1-1 a hmahruai chungin chawlhlawk an hmang.
Chawlhlawk hnu lamah MLS FC an khel tha chhunzawm a, goal thun hmasa zawkah an tang leh. Minute 53-na lekah goal hmahruai thuntu K Hmangaihkima chuan an goal hnihna thunin an hmahruaina a tizau. Si hnih an phurh hnuin MPFC an tang thar leh zual a, minute 57-na lekah Lalbiaktluanga chuan goal thunin an si phurh sut then.
Goal an thun vangin MPFC phur thar bawk mah se MLS tan Felix Lalruatsanga chuan minute 75-naah an goal thumna a thun zui leh ta mai a, an inkar a tizau nawn leh. Felix-a goal thun hnuin goal dang a luh belh thei tawh lova, MLS chuan Mizoram Police FC lakah 3-1 a hnehna changin semi-final an inhlangkai. MPFC laka goal hnih thun K Hmangaihkima chu ‘Player of the match’ ah thlan a ni.
I Day football tournament 2026 quarter-final hi vawiinah khelh zawh a ni dawn. Chawhma dar 11:00-ah Aizawl FC leh Saikhamakawn FC an intum ang a, chawhnu dar 2:00 atangin Ramthar Veng FC leh Chanmari FC ten quarter-final hnuhnung ber an khel zui leh bawk ang.
Kanan FC leh MLS FC ten semi-final an lut
