Tottenham Hotspurs chhuah-sana Germany lama insawn ta Harry Kane chuan a club thar Bayern Munich tan goal a khung mawlh mawlh a, kar-liamta Inrinni zan pawh khan team lian Borussia Dortmund khelmuala 4-0 hnehna an chan tumin England captain hian goal thum ngawt a thawh leh a, kumin nipui thawt laia a zawm Bavarians tana ‘hat-trick’ vawi-thum a siamna a ni ta.
Ti hian, Kane hian 2023-24 season kal laiah Bayern Munich leh England tan belhkhawmin goal 19 a thun tling ta a ni.
Bayern hian a zawna Bun-desliga title 12 an lakna tur chak takin an um leh mek a; Kane an kawl hnuah goal thun an harsat lo tluang zel a; kartawp inkhelah pawh tan atanga minute 10 lek chhungin mual-neitu team lakah sihnih faiin hma an hruai hman der!
Dayot Upamecano chuan minute li an khelh tlin rualin mikhual hmahruaina goal a khung a; minute kua an khel tling tihah Kane chuan thawh belhin, second half-a a goal hnih dang nen Tottenham forward hlui hian Bundesliga game 10 a khelh tawh atangin goal 15 tehreng a khawl tling tawh!
A hma chiah chawlhkar tawp inkhelah England international hian Darmstadt lakah goal thum khung bawkin, German top flight-ah hat-trick a siam zawn ta hial a ni.
Borussia Dortmund kha kumin April ni 1 hnu lama league-a tlawm la nei leh ta lo niin, champion lai lakah erawh dawl zawrin an zawr!
Inrinni inkhelah Dortmund tan Donyell Malen chuan a hun tha neih hlohin, veteran Bayern keeper Manuel Neuer pawhin tha zetin Marco Reus-a goal tur a dansak ve bawk.
He inkhela Munich lam tana lunghnurna tur awmchhun chu chawlhlawk dawna official-te a hnial nat deuh vanga an boss Thomas Tuchel-a yellow card hmuh kha a ni deuh mai!
Bundesliga table-ah Bayern Munich hian khelh 10-a point 26 neiin pahnihna dinhmun an luah chhunzawm a; Inrinni zan inkhel danga Hoffenheim muala 3-2 hnehna chang Bayer Leverkusen chuan league hma hruai zui zelin, a sang pahnihte hi point hnihin an la inthlau kal zel.
Table-a palina luahtu Dort-mund hian naktuk zan Champ-ions League-ah Newcastle United an mikhual ang.
Kane-a ‘hat-trick’ vawithumna!
