Himachal Pradesh Congress chuan BJP MP ni mek Kangana Ranaut chu thu dik lo sawiah leh a duh duh dana an party hruaitu Sonia Gandhi sawichhiaah puhin, chhui chian an cho thu sawiin, inpuhhmingchhiatna case an thehlut.
Kangana hian pathianni khan BJP programme Manali-a an hmannaah Himachal sorkar chu central atanga loan leh pawisa thahnem tak an pek thu sawiin, disaster fund pawh an pek hnem thu a sawi a. Hengte hi a nihna tur anga hman a ni lo fai vek a, CM relief fund-a a luh nghal zel thu sawiin, CM relief fund lah Sonia Gandhi-i’n a duh duh dana a pawhkawi a nih avangin Sonia relief fund a nih tak ber thu leh a account-a a dah tir zel thu a sawi a ni.
Hemi chungchang hi Congress minister Vikramaditya Singh nimin khan sawiin, “Dawt muhlum dik tak a ni. Kan state inrelbawldan hre miah lovin Kangana hian thu a sawi a ni,” a ti a. Ral atanga duh duh sawi lo hian a hmun ngeiah a duh chuan a rawn enfiah thei ang, tiin. Court-a a inlan ve zak zak theih nan leh a duh duh phuahchawpa ram khat MP meuhin a sawi tawh loh nan Congress chuan chhuichian ngei kan phut a, inpuhhmingchhiatna case kan file ta a ni, a ti bawk.
Congress hian chhui chian an cho thu leh Sonia account-ah Re 1 tak ngial pawh a luh loh thu thuchhuah an siam zui ve bawk a, Kangana hian a duh chuan a rawn enfiah thei reng e, tiin. Ngaihdam dilna a siam zui thuai lo a nih chuan na zawka an kal zel dawn thu an sawi bawk.
Kangana Ranaut chungah Himachal Congress thinrim, chhui chian an cho
