Kanye-a’n Istanbul concert-ah attendance record an siam

Kanye-a’n Istanbul concert-ah attendance record an siam
Kanye West-a’n Istanbul-a Ataturk Olympic Stadium-a May ni 30-a concert a neihah mipui 1,18,000 an pungkhawm thei a, Kanye chuan stadium-a concert awm tawh zawng zawnga mipui tam berna a la nih thu puangin, “Hei hi ka puang lo thei lo, record kan siam a, 1,18,000, stadium performance awm tawh zawng zawnga mipui tam berna a la ni,” a ti.
He show hi Istanbul-a zan dar 9-ah tanin, festival-style event-in an kalpui a, DJ set, laser leh light show bakah pre- le after party punkhawmna thlengin an buatsaih a, Turkish artist Yener Cevik, Mavi, Sena Sener, Pera leh Motive te pawh an inlan a, Turkey khaw hrang hrang bakah ram dang, Russia, Kazakhstan, UK, Germany, US leh Poland lam atanga concert chhimtu te pawh an kat nuk a ni.
Organiser-te chuan mipui an tam em avangin an innek buai loh nan zan dar 9-a tan tur chauh ni mah se stadium game hi tlai dar 3 atangin an hawng tan hial a ni. He concert-ah hian Kanye hi rapper Travis Scott-a’n a tawiawm nghe nghe a ni.
Istanbul-a a concert hi tun kum 11 chhunga Kanye-a’n European tour a neih leh tanna a ni a. West hian April thla khan UK-a concert neih hi a lo tum taw a, mahse, US sorkarin an rama Kanye West a concert hian mipui tan thil tha a thlen dawn lo tiin Wireless Festival a headline tur chu an rama concert phalna an lo pe duh tawh lo a, hei vang hian a festival pawhin PepsiCo leh Diageo atanga sponsorship an neih tawh pawh an chân phah hial a ni.
Kanye hi Europe-ah hian sorkar lakah a tlatlum lo riau a, Marseille-a show a neih tur pawh French official ten dan an tum avangin an sawn leh ta rih a, Poland leh Switzerland-a show a neih tur pawh an tulh tawh a, Istanbul-a show a neih ni tak hian Italian thuneitu ten West leh Travis Scott ten July thlaa mi 1,03,000 lenna RCF Arena, Reggio Emilia-a show an neih tur pawh an cancel sak thu an puang ve leh chiah bawk.