Kar a hla, duhlai mi u!

Kar a hla, duhlai mi u!
Hlim taka in awm dun laiin pakhat zawk kal bo a tul ta tlat. Zirna vang a ni emaw, hnathawhna vang emaw pawh a ni thei. A chhan chu eng pawh nise i nervous deuh tlat em? Chutianga i awm a nih pawhin i thiam awm tho e.
Hetianga in awmbo san hi inthenna in a zui duh fû a, mahse, inthen chu i duh lo tak zet a nih chuan in in awm bosan hmain i inkar vawng nung zel turin tih theih i nei e.
Hetiang hunah hian a awm bo lo tur zawk hi a ngaihtha lo zawk kan ni duh hle a, chuvangin engkim tlang taka sawi mai thin tur a ni. A rawn haw leh hunah eng boruak nge a rawn beisei dawn tih te zawt hreh suh. In awm bo san chhungin engtin nge in inbiak pawh ang tih te pawh dawi fel nghal a tha- text, email, facebook nge phone. Insawi chian loh chuan a rilru natna i thlen thei tlat. Khua hmuna in awm laia i text thin ang khan i lo text ta lo te pawh a ni thei. Chuvangin in biakpawh a, in thlunzawm zel dan tur chu ruahmanna fel tak neih sa a tha ber a ni.
A nih leh a rawn haw leh hunah engtin ni ang? Pangpar nena airport-a lo hmuah te pawh a tichi viau maithei (airport a nih kher loh pawhin tihdan a awm zel tho a nia). Card lo pek te pawh a fuh viau thei ang.
Mahse, a pawimawh ber chu lo hmanhmawh chung chung loh tur a ni. Rei tak in awm hrang tawh a, inawm hran chhungin mi chi hrang hrang in tawng a. Kan la naupan deuh lai phei chuan kan inthlak danglam chak em em a, thil tam tak a lo danglam hman thei a ni. A engamah hmaa kan inawmbo san hma anga engkim awm leh nghal thlap tura lo beisei ngawt tur a ni bik lo.
In awmbo san rei deuh chuan nghawng tam tak a nei a, an lakah kan rilru a no sawt a, kan thikthu pawh a chhe deuh mai thei. Chu chu thil nihphung lo a ni chuang lo. Kan awm ho leh theih hnuah boruak thar kan siam thiam a ngai ta a ni.
Khawiah emaw chhuah dun a, eng emaw thil thar han tih dun te pawh a tichi viau ang. A rilru put hmang te hrechiang turin han kawm nel hmasa leh te te ang che. Rei tak in awm bo san chuan in be pawp reng mah ila, hmel inhmu lo ta na na na chu inhmuh leh hi chuan kan khawr deuh a, kan inkarah eng emaw tak awm ang te pawhin kan hre thin a, chumi boruak chu tireh a, a hma anga innel sarh a kan awm leh theih nan, hman hmawh vut vut lova hma kan lak thiam a pawimawh a ni.