Travis Scott chu kar khat chhunga US-a zaithiam lar ber niin, Billboard Artist 100 chart-ah a No.1 a, rapper zingah kumina he chart-a No.1 ni thei hmasa ber a ni. Travis Scott hi 2018 khan a album ‘Astroworld’ a tlangzarh hlim khan he chart-ah hian a lo No.1 tawh a, tunah a chhunzawm leh ta chiah a ni.
Billboard Artist 100 chart hi kar khat chhunga US-a zaithiam lar dan tehna niin, chart ranking siam nan hian kar khat chhunga album leh hla an hralh tam dan te, streaming leh radio airplay te chu tehna pawimawh a ni.
Travis Scott hian a album thar ‘Utopia’ hralh that zar a zo a, he album hi kar khat chhunga 4,96,000 hralhin Billboard 200 (albums) chart-ah a No.1 a, he album-a a hla 19 te chu Billboard Hot 100 (singles) chart-ah an lang vek bawk a, ‘Meltdown’ phei chu No.3 niin, ‘FE!N’ chu No.5 a ni bawk.
Travis Scott hi kumina he chart-a rapper No.1 ni thei hmasa ber niin, rapper chauh ni loah chuan kumina he chart-a No.1 ni thei pakuana a ni. Kuminah he chart-ah hian Taylor Swift hi kar 17 a No.1 tawh a, Morgan Wallen kar riat No.1 tawhin, Jimin, Rihanna, SEVENTEEN, Ed Sheeran, Stray Kids leh TOMORROW X TOGETHER te chu kar khat theuh an No.1 tawh bawk.
Kar khat chhunga US-a zaithiam lar ber Travis Scott
