Kar khata ni khat ding turin
2-wheeler taxi-ten nawr tum
Aizawl traffic jam tih ziaawmna atana sawrkarin kar khata ni hnih ding tura a tih mek Aizawla two wheeler taxi service chu ni khat chauh an din theihna’n sawrkar nawr an rel.
Aizawl Two Wheeler Taxi Association (ATTA) hian Thawhlehni khan General Assembly vawi-5 na an hmang a. An thurel zingah, sawrkarin an eizawnna karkhata nihnih a din tir chu karkhata nikhat an din theihna’n nawr an rel a, mimal lirthei aia eizawnnana hmangte tlan theih hun tih tlem zawk a ni chu tha an tih loh thu an sawi.
Assembly hmanpuitu chief minister Zoramthanga chuan khawpui thang zel leh kawngpui tawt zelah mipui tan two wheeler taxi a tangkai tih a sawi a. Churihrualin lirthei khalhtute chu fimkhur turin leh ruihtheihthila buai lo turin a chah.
Two wheeler taxi khalhtute chu ram hmelhmang siam danglamtu an nih thu leh mipui tana rawngbawltu pawimawh tak an ni, tiin, rinawm tak leh taima taka awm zel turin a chah bawk.
Mizoram chu a chhunga chengten kan siam nawm leh kan nuamin, kan chei naw mloh leh kan nuam lo mai dawn a ni tih chief minister hian a sawi a. Ram siamthat kawngah mitin kan pawimawh tih a sawi. “Mizoram hi ram entawntlak leh ram nuama siam tur chuan hospitality lamah te hma kan sawn belh zel a tul a. Two wheeler taxi khalhtute hi ram hmel zahawmna leh tih mawi kawnga thawktu pawimawh in ni,” a ti.
Aizawl Traffic Addl. SP C Vanlalvena chuan ATTA member-te hi Traffic dan leh hrai hrang hrang an hriat tulte a hrilh a. ATTA president Lalhmunmawia chuan an member-te chu inthuamna chungchangah te, traffic dan zawm chungchangah te tan la thar zel tur leh, ruihtheihthil laka fihlim turin a chah a ni.
Tun dinhmunah hian ATTA hnuaiah member inziaklut 2600 chuang an awm a. AMC-in a duan angin two wheeler taxi stand 50 a awm a ni.
Kar khata ni khat ding turin 2-wheeler taxi-ten nawr tum
