October chawlhkar lina, kartawp zirtawpni, Inrinni leh Pathianni khan Europe-a tualchhung league hrang hrang khelh chhunzawm leh a ni a. European top 5 league a thil thleng langsar zual, football hnuhma thar kan tar lang leh ang.
English Premier League
Zirtawp zan khan EPL hmahruaitu Tottenham Hotspurs chuan Selhurst Park-a an khingpui Crystal Palace chu 2-1 in an hneh. Palace an hneh tum hian Tottenham forward Song Heung-min chuan minute 66-naah Son Heung-Min chuan an goal hnihna a thun. Son hian season kal meka Mimual (away) ah bik goal ruk a thun tawh a. EPL player zingah Mimuala goal thun tam ber a ni rih.
Tottenham hian season kal mekah vawi 10 khelin point 26 an hmu tawh. Tottenham manager thar Ange Postecoglou chuan EPL a hmachhawn hmasak 10 atangin point 26 a hmuhpui a, EPL record thar a siam. Manager thar zingah khelh 10 atanga point 26 hmu thei hmasa ber a ni.
Wolves player pawimawh Pedro Neto chuan season kal mekah assist vawi sarih a nei tling der tawh a. Season thara Europe’s top 5 league-ah assist nei ngah ber a ni mek a. Newcastle United nen 2-2 a an inhnehtawk tumin Neto hian hliam a tuar hlauh thung.
Pathianni zanah Manchester United laka goal hnih thun Erling Haaland khan season kal meka EPL-ah goal 11 thun tawhin, top scorer a ni mek a. Haaland goal thun zat leh Manchester United in Premier League-a goal an thun zat a intluk mek. Haaland hian minute 64 dan zelah goal thun emaw, assist emaw nei ziah ang a ni a. Heti lama record nei tha ber a ni a. Record nei tha dangte chu Thierry Henry (86), Sergio Aguero (86) leh Salah (93) te an ni.
Manchester United chuan season kal meka game 10 an khelh tawhah vawi nga ngawt tlawm zawkah an tang tawh a, season chhe tak an hmang mek.
Spanish LaLiga
Inrinni zan El Clasico-a goal hnih thun Jude Bellingham chuan La Liga a khelh hmasak vawi 10-ah goal 10 a thun tling der tawh a. England leh Real Madrid midfielder Bellingham hi ‘Ronaldo tak tak’ an tih mai thin Ronaldo Nazario hnuah La Liga game hmasa 10-a goal 10 thun leh thei hmasa ber a ni a. Ronaldo hian kum 1996-97 khan La Liga a khelh hmasak vawi 10-ah goal 10 a lo thun tawh.
Bellingham hi El Clasico hmachhawn hmasak ber tuma goal khat aia tam thun thei pathumna a ni a, Barcelona player pahnih David Villa leh Pierre-Emerick Aubameyang te hnung a zui. Bellingham hi kum 21 tlin hmaa El Clasico-a goal khat aia tam thun thei palina a ni bawk.
Barcelona manager Xavi chuan Real Madrid lakah a team vawi li a tlawmpui ta a. Real Madrid hi manager anga team khat laka a tlawm hnemna ber a ni a. Player a nih lai khan Real Madrid lakah vawi 13 an lo tlawm tawh bawk a. Player a nih laia an ngam loh ngun ber chu Real Madrid tho hi an ni bawk.
Atletico Madrid chu an mualah vawi 14 an chak zawn tawh a. La Liga-ah an muala an chak zawn rei ber record an nihrual tawh a, record thar siam theihna hun tha an nei mek.
La Liga-ah pahnihnaa awm mek Girona chu season kal mekah vawi 11 khel tawhin, vawi kua an chak, vawi khat draw neiin, tlawm zawkah vawi khat an tang bawk. Hei hi La Liga an hmachhawn tawh zawng zawngah game hmasa 11-a an chetthat ber tum a ni.
Italian Serie A
Inter Milan player Marcus Thuram chuan game 10-ah goal li thunin, assist vawi nga a nei tawh bawk a, goal kuaah a inrawlh tawh. 2004/05 a assist data neih a nih hnu lamah Thuram hi Serie A game hmasa 10-ah goal-a inrawlh tam ber a ni.
Inrinni zan khan Juventus chuan an mikhual Verona chu si khat faiin an hneh. Juventus manager Massimiliano Allegri chuan Juventus hi goal chhuah loh vawi 100 a neih tlinpui chiah a. Juventus manager zingah ani aia goal chhuah lo neih tam chu Giovanni Trapattoni (150) a ni.
German Bundesliga
Eintracht Frankfurt leh an inhnehtawk leh tak vangin Borussia Dortmund chu Bundesliga-ah tlawm nei lovin vawi 17 an kaltluang ta chiah a, hei hi German top flight-ah tlawm nei lova an kaltluan rei ber tum a ni.
Inrinni zanah Bayern Munich in 8-0 ngawta SV Darmstadt 98 an sawp tumin Harry Kane chuan hattrick a siam. Kane hian Bundesliga-ah vawi kua khelin goal 12 a thun tling der tawh a, Bundesliga chanchinah game kua atanga goal 12 thun thei hmasa ber a ni.
Bayern Munich hian si riat faia an chakna hi second half-a an thun vek a ni a, Bundesliga-ah second half-a goal riat thun thei hmasa ber an ni a. League game hmasa pakuaah goal 34 thun tling thei hmasa ber an ni bawk.
Xabi Alonso chuan a team enkawl Bayer Leverkusen a chetthatpui chhunzawm zel a, vawi riat a chak zawn pui tawh. Alonso hi Leverkusen manager awm tawh zawng zawng Bundesliga-a a kaisan 1979 hnu lamah vawi riat chakpui zawn thei hmasa ber a ni nghal.
French Ligue 1
Pathianni zanah PSG in 3-2 Brest an hneh tumin Kylian Mbappe chuan goal hnih a thun a, Mbappe hian inelna hrang hrangah club tan goal 250 a thun tling ta chiah. Goal 250 a thunte hi Manaco tan goal 27 leh PSG tan goal 223 te an ni.
Messi-Ronaldo
Inter Miami in MLS play-off an khelh phak loh vangin Lionel Messi chu inkhel lo vin a awl mek. Cristiano Ronaldo chuan Al Nassr tan a khelh hnuhnun ber Al Feiha-ah goal a thun lo. Ronaldo hian goal 11 thun tawhin, Saudi Pro League-ah top scorer a ni mek.