International break a nih hnuin inrinni zan atang khan Europe a tualchhung league hrang hrangte khelh chhunzawm leh a ni. Inrinni leh Pathianni zana inkhelah hnuhma thar hmuh tur a awm leh nual a. Kar tawp football a hnuhma langsar zual kan tarlang ang.
English Premier League
Pathianni zan khan champion lai Liverpool chuan hun pek belh minute 90+5 a penalty a hmuh hmangin Burnley an hneh thei hram. Burnley laka Liverpool chakna goal thuntu Salah khan EPL-ah goal 188 a thun tling ta chiah a, Andrew Cole record khumin EPL-a goal khung tam palina a ni chiah. Salah chungah hian Alan Shearer (260), Harry Kane (213) leh Wayne Rooney (208) te an la awm.
Pathianni zana Manchester derby-ah City in 3-0 ngawtin United an sawp. United an hneh tum hian City tan Erling Haaland chuan goal hnih a thun. Haaland hian EPL-ah home game vawi 50 a khel tling chiah a, goal 50 a thun tling bawk. Home game-ah goal 50 thun tling tura game mamawh tlem pahnihna a ni a, a chungah hian khelh 47 atanga goal 50 thun tling Alan Shearer a awm. Haaland hian 2022-23 a City a zawm atangin EPL game khata goal khat aia tam vawi 22 ngawt a nei a, hemi chhung hian EPL-ah goal khat aia thunna game nei tam ber a ni.
City laka mualpho United khan season tharah vawi li khel tawhin point 4 chauh (W1, D1, L2) an hmu a, hei hi 1992-93 hnu lamah EPL-a bul an tan chhiat ber tum a ni.
Season tharah pawh champion lai Liverpool an vannei a, champion zia an chhuah chhunzawm zel. Liverpool hi season tharah an la chak vek a, chakna goal an thun hi hun tawp dawn hnaih minute 10 chhung leh a hnulama an thun vek a ni. An khelh that loh tum pawhin hu tawp dawnah goal an thun a, point thum an hmu leh hram thin. Hei hi champion zia chu a ni.
Inrinni zan khan Newcastle United player thar Nick Woltemade chuan a club thar tan a khelh hmasak berah goal a thun nghal a. Woltemade hi German player zingah EPL an khelh hmasak bera goal thun nghal thei pathumna a ni a, Jürgen Klinsmann leh Ilkay Gündogan te hnung a zui.
Season tharah Liverpool in goal thun an harsat zui zel a, vawi li khel tawhin goal an la thun miah lova, hei hi EPL-ah game hmasa pali a goal an thun loh awmchhun a la ni.
Spanish La Liga
Champion lai FC Barcelona chuan Pathianni zan khan 6-0 ngawtin Valencia an sawp. Barca tan hian bench atanga lut Raphinha leh Robert Lewandoski ten goal an thun ve ve a, hei hi Barca chanchinah kum zabi 21 naa a thlen vawi khatna a ni. Barca tana goal hnih thuntu Robert Lewandoski chuan ama record siam tawh vek a khum a, Barcelona tan La Liga-a goal thun thei upa ber a ni. Lewandoski hian kum 36 leh ni 66 a upa niin Barca tan goal a thun a, Barca tana goal thun thei upa record chu kum 2024 khan a lo siam tawh a. Pathianni zan khan kum 37 leh ni 24 a upa niin ama record a rawn khum.
Bayer Leverkusen manager hlui Xabi Alonso chu a club thar Real Madrid-ah a chetha nghal hle a, La Liga game hmasa paliah Real Madrid hi a chakpui vek. Kum 2009-10 a Manuel Pellegrini hnu lamah Alonso hi Real Madrid manager zingah an game hmasa palia chakpui vek thei awmchhun a ni rih.
Season kal mekah Real Madrid tan Kylian Mbappe leh Arda Guler an chetha dun viau a, an ni pahnih hian goal thun theihna chance vawi 14 ve ve an siamchhuak tawh a. Europe’s top 5 league-a season kal mekah chance siam chhuak hnem ber an ni dun mek.
Italian Serie A
Kum 40 leh ni 5-a upa Luka Modric chuan Pathianni zanah 1-0 a Bologna an hneh tumin chakna goal a thun. Modric hian Serie A midfielder zinga goal thun thei upa ber record thar a siam a, kum 38 leh ni 169-a upa Nils Liedholm record a khum.
Napoli head coach Antonio Conte chuan Serie A vawi 244 a hmachhawn atangin point 550 a hlawhchhuak a, manager t coach zingah hetiang zat point hlawhchuak tur game mamawh tlem ber a ni.
Inrinni zanah 4-3 a Inter Milan an hneh tumin kum 19 leh ni 124-a upa Vasilije Adzic chuan Juventus tan goal a thun a. Adzic hi foreign player zingah Juventus tana goal thun thei naupang ber a ni.
German Bundesliga
Season tharah Harry Kane a chetha nghal viau a, goal nga thunin assist vawi thum a nei a, goal riatah a intawlh tling der tawh. Kane hi season kal mek top 5 European league-ah goal a inrawlh tam ber a ni mek.
Bayern Munich forward thar Luis Díaz chuan Bundesliga match hmasa pathumah goal thum a thun tling der tawh a, player thar zingah Bayern club record lo siam tawh Ruggiero Rizzitelli, Luca Toni leh Mario Mandzukic te record a nih rual der tawh.
Dortmund forward Serhou Guirassy chuan Bundesliga a hmachhawn hnuhnung vawi riatah goal 8 a thun tling der tawh a, Europe’s top 5 league-ah season liam ta leh season thar nen goal thun zawn rei ber a ni mek.
Kar tawp football hnuhma langsar
