Katy Perry hla hit ‘Roar’ music video chuan YouTube-ah vawi tluklehdingawn 4 en a hlawh ta a, hmeichhe zaithiam music video a YouTube-a hetiang zat en hlawh thei hmasa ber niin, hmeichhe zaithiam music video zingah YouTube-a entu ngah ber a ni bawk.
He music video hi 2013-a a tihchhuah kha niin, a video hi ramhnuaia ramsa te nen awm anga shoot a ni a, he pop star hi zawng nen thian an nih bakah sai-in a nawn atanga tui a phuh chhuah chu inbual nan ten a hmang a, awle ha te pawh a nawh sak!
He hla hi 2013-a a tihchhuah pawh khan a hit nghal hle a, a album ‘Prism’ atanga a single niin, Billboard Hot 100 (singles) chart-ah kar hnih a No.1 a, Hot 100 chart-a Katy hla No.1 kai thei pakuana a ni. ‘Prism’ album pawh hi a hit hle a, he album-a hla dang ‘Dark Horse’ leh ‘Unconditionally’ te pawh No.1 kaiin, a album pawh i Billboard 200 (albums) chart No.1-ah a debut bawk.
Roar hi 2014 khan Grammy Awards ‘song of the year’ leh ‘best pop solo performance’-ah te nominate a ni a, Recording Industry Association of America (RIAA)-in 2017 khan Diamond certification a hlan a, Katy Perry hla a RIAA Diamond kai hmasa ber a ni. RIAA Diamond certification kai thei chu US-a hla maktaduai 10 hralh tlin theih tihna a ni a, ‘Roar’ hnuah hetiang zat hralh theih hla dang ‘Firework’ leh ‘Darkhorse’ a nei leh bawk.
Katy Perry ‘Roar’-in record siam
