Lunglei district Diblibagh atanga Tlabung panna kawng chu lirtheiin an zawh hleihtheih tawh loh avangin Thawhlehni khan Village Council leh Young Chakma Association tangdun chuan hnatlangin an thawmtha.
PMGSY scheme hmanga siam he kawng hi Diblibagh bakah a chhehvel Khawthlangtuipui hnar lama khaw engemawzat chak lakna kawng pawimawh a ni a, siam zawh a nih hnu-ah mumal taka thawmthat a nih ngai meuh loh avangin, hun rei tak chhung chu he kawng zawh thin lirtheiten harsatna an lo tuar tawh thin niin Diblibagh khawtlang hruaitute chuan an sawi a. Siamthat a nih hun ngaichanga an nghah laiin a chhe zual lai emaw pawh thawmthat tuma hmalakna a awm lo nia sawiin, mamawhna a san tawh avangin hnatlangin an siam ta tih an sawi.
Hnatlanga kawng siamthat hna thawhna atan hian khawchhungmiten an remchan ang sum an thawh khawm a, kawng khuar thuk zual lai chu lirthei tan zawh a nawm zawknan lungin an hnawh nghal zel tih thu dawn a ni.
Hetihlai hian Kolasib district Bairabi Road Zero Point atanga Pangbalkawn inkar kawngpui chhia vangin he kawnga tlan thin khualzin phurte Thawhtanni atang khan an ding a. National Highway No.6 Bairabi panna kawngpui Zero Point leh Pangbalkawn inkar chu lirthei zawh harsa khawpa a chhiat avangin helai kawnga tlan thin khualzin phur bus, maxicab leh taxi-te kawngpui dinhmun a ziaawm hma chu service-na tlakah an ngai tawh loh avangin an tlan lo tih an sawi a ni.
Kawng chhia siamin khawtlang hnatlang
