vKolasib district-a national highway chhia siamthat phutin Kolasib District Drivers & Welfare Joint Action Committee chuan Zirtawpni khan kawng an dang a, sawrkar aiawhte nen an inbiak hnu ah kawng dan hi an titawp lailawk.
Mizoramin mamawh a lakluhna kawngpui NH-6, Kolasib district huamchhung kawngpui a chhiat nasat avangin lirthei a tlan hleithei loa, Kolasib District Drivers & Welfare Joint Action Committee chuan tunkar Thawhlehni khan kawng hi endikin, contractor-te chu August thla ral hmaa a thawmthat bul tan turin an ngen a. Hma lak a nih loh chuan, kawngpui siamthat a nih hma zawng lirthei a tlan tawh loh nan hma lak an tum thu an lo sawi tawh a ni.
Kawng thawmthat lamah an beisei anga hma lak a nih tak loh avangin, an sawilawk ang hian September 1 atang khan kawngpui an dang tan a. Zingkarah Rengtekawn leh Kawnpuiah duty an insiam a, lirthei pawl hrang hranga driver thahnem tak an tel. Lirthei tangkhang awm nual mah se, a hmaa information an lo inpek tawh avangin chuti takin lirthei tangkhang a tam lo niin duty-te chuan an sawi.
Kawng dan avang hian Zirtawpni khan district thuneitute, NHIDCL leh Drivers & Welfare JAC aiawhte an thukhawm a. NHIDCL hian kawnga phah tur boulder leina sum pawh an nei lo tih an sawi a, kawng cheithatna hian central chuan cheng vbch 3.9 ruahman mah se, sum hi a la pek loh avangin harsatna an nei tih an sawi. District bawrhsap pawhin sum awm loh vangin contractor-ten lung tha an ngaihtuah thei loa, a awm hmasa apiangin an hnawh thu leh four lane a awm tawh dawn avangin kawng awmsa cheithatna turah hian sanction a awm tawh lo tih a sawi.
Sawi ho a nih hnu ah JAC hian kawng dan hi Zirtawpni chawhnu dar 1.00 khan an titawp lailawk tih sawiin, hemi hnu hian district thuneitute, NHIDCL leh an hnuaia contractor-te, JAC hruaitute leh Sub Hqrs. YMA hruaitute an thukhawm leh a ni.
Kawng chhia vanga kawng dangtuten titawp lehnghal
