- Congress Thalai
Kawng chhiaa
midang mawhpuh
an tumna hian mipui rilru a ti na
- Congress Thalai
Mizorama kawng chhia avanga mipui harsatna thlengah chief minister Lalduhoma leh PWD minister-in midang mawhpuh an tumna chuan mipui rilru a ti na a, an chungah rinna ngam harsa an ti tawh hle tih a chian thu Congress Thalai chuan an sawi.
Congress Thalai Hqrs. thuchhuak chuan, July 19 atanga Mizoram Oil Tanker Drivers Association-in kawngpui chhe lutuk avanga an nawrh a ngai ta chu pawi a tiin thusawi thiam leh thil dik lo sawimam thiam aia a taka hlenchhuak thei leh innghahna tlak sawrkar Mizoram-in a mamawh zia a tichiangah a ngai tih a sawi.
‘ZPM sawrkarah thal vawi hnih kan hmang tawh a. Sawrkara a fawngvuantu chief minister, minister-te leh MLA 8-in kawng siam tur leh siam mek an tlawh tawh hnua Mizoram dinhmun chu, ZPM official hoin social media vela phochhuah tur thlalak thar an neih belh leh kawng chhia avanga nawrhna leh harsatna thleng hi a ni. Kawng chhia avangin khaw kar kawngah lirthei tam tak an tangkhang mek a. Hetihlai hian a changtu PWD minister lah kawng chhe siamthat lam aiin nuamtawla lam lamah a insawrbing zawk hi thil zahthlak leh kohhran mitmei zah lohnaah kan ngai,’ a ti.
Kum 2022 Assembly thutkhawmah mimal lirthei khalhtute leh enkawltute hmakhaw ngaitu nia inchhal, private member’s bill – ‘Mizoram Private Transport Workers (Welfare) Bill 2022’ tih chu tuna ZPM sawrkara minister Dr Vanlalthlana’n a pu lut tih Congress Thalai hian sawiin, khatih laia MNF sawrkar khan driver-te dinhmun siam lam ngaihtuahna an neih loh avangin pass ni ta lo mah se, tunah a ti thei zawk dinhmuna an din tawh hnuah engmah driver-te hamthatna leh an dinhmun ngaihtuaha an harsatna chingfel tura thawm nei loa a ngawi reng chu mak a tiin, ruling nih hnuah driver-te a veina chu a bo tawhah an ngai tih a sawi.
‘Kumin chhung hian kum 15 daih kawng siam tura inzuarte kawng siamin thla khat pawh a daih loh zel avangin driver, lirthei neitute leh hnathawktu zin veivakten nasa takin harsatna an tawk a. Hetihlai hian ZPM sawrkara a fawng vuantute chu mahni inhaivur, sam phun belh leh mit vun pawh mar hri angin an len tir a. ZPM sawrkarah engmah beisei tur a awm lohzia a tichiangah kan ngai,’ tiin, central BJP sawrkarin chief minister Lalduhoma leh a hote hmalakna aia BJP president Dr K Beichhua ngenna an ngaipawimawh zawk chu a ram leh hnam ang pawha mualphona, Mizoram politics-a la thleng ngai lo leh thil zahthlak tawpkhawkah Congress Thalai chuan a ngai tih a sawi bawk.