Tunlaiin an khaw pawhtu kawngpui pawimawh a chhiat avangin Tlabung mipuiin harsatna an tawk a, whatsapp group pawh kawng chhe chungchang inhrilhna hmun a ni ber e, fiamthu ti takin an ti.
Ni tin mamawh thil hrang hrang an lakna kawng pawimawh, Tlabung leh Lunglei inkar kawng National Highway 302 a chhiat avangin a kal hleih theih loh a, hei hian kawng hrang hrangin nghawng a nei mek tih thu dawn a ni.
Km 97-a thui Lunglei leh Tlabung inkar kawng hi a chhiat avangin lirtheiin nilenga tlan a ngai a, ni khata ban hman chuan a vanneihthlak an ti hial. Nileng zankhuaa tlan a ngai a, lirtheia riah a ngai hial thin.
Tlabung atang hian Lunglei-a tlan maxi cab 33 vel an awm a, panga vel chiah an tlan. Nuar ni lovin an tlan ngam lo a, panga vel pawh hi hire a ngai. Rs 8000-in an hire a, a tlante pawh hi tlawmngaia tlan an ni tih thu dawn a ni.
Dam lohna avang leh thil pawimawh dang vanga zin ngei ngei ngai an awm avangin hire-a tlan hi an awm a, chutianga tlan pakhat chuan kar khat chhungin a motor siam nan Rs 25000 a sen thu a sawi.
Pik up hmanga zin an awm bawk a, mi pakhat tan Rs 1000 a ni.
Filling station pakhat a awm a, mahse kawng a chhiat avangin thla thum chuang tuialhthei a thleng tawh lo.
Tlabung-a chanchinbumi pakhat chuan, “Ni tin mamawh thil a vang a, a to bawk,” a ti a, “Truck an tlan lo a, bungraw phur an thang rei a… kawngah lirthei tang a awm lohvin mak kan ti zawk tawh,” a ti bawk.
Kawng chhiain Tlabung tibuai
